ФутболымкIэ Урысыем и Кубок икъыдэхын хэлэжьэрэ командэхэм зичэзыу ешIэгъухэр яIагъэх. Мыекъопэ «Зэкъошныгъэр» Красно­дар краим ит станицэу Ленинградскэм икоманэу «Пионер» зыфиIорэм IукIагъ ыкIи текIоныгъэр къыдихыгъ.

«Пионер» (Ленинградскэр) — «Зэкъошныгъ» (Мыекъуапэ) — 3:3 (2:1) (пенальтикIэ 2:4).

Мыекъуапэ икоманэ зыIукIэгъэ «Пионерыр» Урысыем и Кубок икъыдэхын хэлэжьэрэ любительскэ командэ 11-м ащыщ. Ау щыт нахь мышIэми, ащ утекIоныр зэрэмыпсынкIэр зэIукIэгъум къы­гъэлъэгъуагъ. Командэхэм гъогогъу пчъагъэрэ Iэгуаор къэлап­чъэм дадзагъ, футболыр зыгу рихьыхэрэр агъэгушIуагъэх. Я 3-рэ такъикъым «Зэкъошныгъэм» пчъагъэр къызэIуихыгъ, Iэгуаор къэлапчъэм дэзыдзагъэр Дат­хъужъ Адам. Ау тифутболистхэр бэрэ гушIонхэу хъугъэп. Апэрэ таймыр амыухызэ бысымхэм гъогогъуитIо Iэгуаор дадзагъ ыкIи ыпэ ишъыгъэх. ЯтIонэрэ таймым Адыгеим икомандэ щешIэрэ Джа­браил Кадиевым пчъагъэр зэ­фэдиз ышIыгъ. Ау такъикъ 20 тешIагъэу «Пионерым» джыри зэ къэлапчъэм Iэгуаор дидзагъ — 3:2. Ау ешIэгъур аухынкIэ тIэкIу къэнагъэу, я 90-рэ такъи­къым, «Зэкъошныгъэм» икапитанэу Делэкъо Аскэр пчъагъэр зэфэдиз ышIыгъ — 3:3-у зэIукIэгъур аухыгъ. Ау ешIэгъум текIоныгъэр къыщыдэзыхыгъэр мы мафэм къэнэфэн фэягъ. ПенальтикIэ Адыгеим икомандэ нахь лъэшэу къычIэкIыгъ, пчъагъэр — 4:2.

Урысыем и Кубок икъыдэхын фэгъэхьыгъэ зичэзыу ешIэгъум «Зэкъошныгъэр» IукIэщт Крас­нодар краим ипсэупIэу Павловскэм икомандэу «Кубань Холдинг» зыфиIорэм. Ар Мыекъуапэ щыкIощт, мафэр джыри агъэ­нэфагъэп.