Хэхъоныгъэхэр ашIынхэм фэшI
Урысые Федерацием икъушъхьэ шъолъырхэм я Форум непэ Адыгеим щыкIуагъ. Къушъхьэ чIыпIэхэм зыпкъ итэу хэхъоныгъэхэр ашIынхэм къэзэрэугъоигъэхэр тегущыIагъэх.
[caption id="attachment_136953" align="aligncenter" width="800"] Сурэтыр: А. Лаутеншлегер.[/caption]Iофтхьабзэр амыублэзэ адыгэхэм ялъэпкъ культурэ, яшэн-хабзэхэр къизыIотыкIырэ экскурсием хьакIэхэр рагъэблэгъагъэх.
Форумыр Лъэпкъ музеим щыкIуагъ. Ащ хэлэжьагъэх УФ-м икъушъхьэ шъолъырхэм я Альянс ипащэу Рамазан Абдулатиповыр, АР-м и Къэралыгъо упчIэжьэгъоу ТхьакIущынэ Аслъан, УФ-м и Общественнэ палатэ инахьыжъхэм я Совет итхьаматэу МэщбэшIэ Исхьакъ, УФ-м и Общественнэ палатэ хэтэу, агропромышленнэ комплексым ыкIи къоджэ псэупIэхэм хэхъоныгъэхэр ягъэшIыгъэнымкIэ Комиссием ипащэу Айгун Магомедовыр.
Рамазан Абдулатиповым Iофтхьабзэм пэублэ гущыIэ къыщишIызэ къушъхьэ чIыпIэхэм зыпкъ итэу хэхъоныгъэ ашIыным мэхьанэ ин зэриIэр къыхигъэщыгъ. Урысые Федерацием ызыныкъо къушъхьэ чIыпIэхэм аубыты, ахэр шъолъыр 37-мэ арытых.
— Къушъхьэ зекIоным хэхъоныгъэ зэришIыщтым дакIоу, мы чIыпIэхэм ащыпсэущтыгъэ, ащыпсэухэрэ цIыфхэм яшэн-хабзэхэр зыщыдгъэгъупшэ хъущтэп, ахэр хьакIэу къакIохэрэми ашIэн фае. Къушъхьэхэм ащыпсэурэ цIыфхэм сыдигъокIи лIыхъужъныгъэ зэрахьэщтыгъ, ахэр бэгъэшIагъэх, сыда пIомэ ащ жьы къабзэ къащэщтыгъ. Мы чIыпIэхэм хэхъоныгъэ ашIыным пае гумэкIыгъоу къэуцухэрэм непэ татегущыIэщт, хэкIыпIэхэм тяусэщт. 1991-рэ илъэсым Дагъыстан къушъхьэхэм афэгъэхьыгъэ программэ зэхэдгъэуцогъагъ ыкIи ар щыIэныгъэм щыпхырытщыщтыгъ. Илъэс заулэкIэ федеральнэ статус ащ иIэ хъугъагъ, — къыIуагъ Р. Абдулатиповым.
Сыд фэдэ цIыф лъэпкъи исуверенитет къызэтенэн фае. УФ-м и Президент патриотизмэм мэхьанэ ин зэрэритырэр хьакIэм къыIуагъ. Непэ тикъэралыгъо чIыпIэ къин зэритыр, Урысыем ицIыфхэр къэухъумэгъэнхэм пае хэушъхьафыкIыгъэ дзэ операциер зэрэзэхащагъэр, тызэгъусэу пыим тыпэшIуекIон зэрэфаер къыхигъэщыгъ.
АР-м и Къэралыгъо Совет — Хасэм и Тхьаматэу Владимир Нарожнэм Адыгеим и ЛIышъхьэ ыцIэкIэ къэзэрэугъоигъэхэм шIуфэс арихыгъ. Тиреспубликэ зэгурыIоныгъэ илъэу лъэпкъ зэфэшъхьафыбэ зэрэщыпсэурэр ащ къыIуагъ.
— ТичIыопс идэхагъэ, икъэбзагъэ ишIуагъэкIэ цIыфыбэ тадэжь къэкIо. Къэралыгъо программэхэм, лъэпкъ проектхэм яшIуагъэкIэ къушъхьэ чIыпIэхэм зыпкъ итэу хэхъоныгъэ ашIы. АР-м и ЛIышъхьэ ащ лъэшэу ынаIэ тет. Мы аужырэ илъэсхэм тишъолъыр зекIоу къакIохэрэм япчъагъэ зэхапшIэу хэхъуагъ. Мы лъэныкъом джыри хэхъоныгъэхэр ышIынхэмкIэ гухэлъышIухэр щыIэх. УФ-м икъушъхьэ шъолъырхэм я Альянс ипащэу Рамазан Абдулатиповыр Адыгеим къызэреблэгъагъэмкIэ тыфэраз, — къыIуагъ В. Нарожнэм.
Къушъхьэхэм апэгъунэгъу чIыпIэхэр зэтырагъэпсыхьанхэм пае шъолъыр ыкIи федеральнэ программэу агъэфедэхэрэм нэужым тегущыIагъэх. Къушъхьэ чIыпIэхэм зыпкъ итэу хэхъоныгъэ ашIыным фэшI къэралыгъо IэпыIэгъу зыфэхъущтхэм ыкIи а IофшIэныр хэбзэгъэуцугъэм диштэу гъэцэкIэгъэным фытегъэпсыхьэгъэ Iэнэ хъурае мы мэфэ дэдэм зэхащагъ. ХэбзэгъэуцунымкIэ ыкIи зэгъэпшэн правоведениемкIэ Институтэу УФ-м и Правительствэ дэжь щызэхащагъэм инаучнэ IофышIэ шъхьаIэу Елена Галиновскаям ар зэрищагъ.
ДЕЛЭКЪО Анет. Сурэтыр: А. Лаутеншлегер.