Мамырныгъэм пеIэн дышъэ щыIэп
Зи Хэкужъ къэзгъэзэжьыгъэхэм я Мафэ игъэкIотыгъэу республикэм щыхагъэунэфыкIыгъ. Адыгэ лъэпкъым иблэкIыгъэ зызыфэбгъазэкIэ, гъогу къурпэн хьылъэ дэдэ къызэрэзэпичыгъэр, ау иакъыл-Iушыгъэ, игукIочIэпкъ лъэш ар къызэриухъумагъэр нафэ къыпфэхъу.
Сыд фэдэрэ зауи, сыд фэдэрэ хьазаби, егъэжьапIэ зиIэм, ухыжьыпIи иI. Ау Кавказ заор анахь хъугъэ-шIэгъэ тхьамыкIагъоу адыгэхэр зыужъгъэигъэ, зэбгырызыдзыхи, дунаим щизытэкъухьагъ. Ащ уахътэ тешIи, я ХХ-рэ лIэшIэгъум иапэрэ ныкъом, 1941 — 1945-рэ илъэсхэм, Хэгъэгу зэошхоу тикъэралыгъо къырашIылIэгъагъэми, лъэпкъ цIыкIоу, ау гушхоу, лIыбланэу адыгэхэр хэлэжьагъэх, ящытхъу арагъэIуагъ. ТинасыпкIэ Хэгъэгу зэошхом советскэ народым ТекIоныгъэр къыщыдахыгъ, мамырныгъэр тагъэгъотыжьыгъ. ЦIыф лъэпкъ пшIы пчъагъэу Урысыем щызэдэпсэухэрэм тIэ зэкIэдзагъ, Хэгъэгум паемэ, хэти зэблэжьырэп. ТиблэкIыгъэ чыжьи, тинепи, тикъэкIощт мэфакIи акъыл хэлъэу зэтэгъашIэ ыкIи зэтэгъафэ. Уитарихъ пшIэн фае икъоу, ащ уапэкIэ уегъаплъэ, кIуачIэ къыпхелъхьэ.
Зи Хэкужъ къэзгъэзэжьыгъэхэм я Мафэ ехъулIэу АР-м и Лъэпкъ тхылъеджапIэ краеведческэ ыкIи лъэпкъ литературэмкIэ иотдел тхылъ къэгъэлъэгъонэу «ЧIыгу гупсэм нахь лъапIэ щыIэп» зыфиIорэр къыщызэIуахыгъ.
Мурадэу ащ иIэр тхылъеджэхэр адыгэм итарихъ, анахьэу Кавказ заом илъэхъан, ар къежьэнэу зэрэхъугъагъэм фэгъэнэIосэгъэнхэр ары. АщкIэ IэубытыпIэ шъхьаIэх тхылъ зэфэшъхьафхэр: «Гибель Черкесии», «Кавказ.
Трагедия изгнания», Р. Мэхъошым иеу «Зов Родины», М. Бэджанэм итхылъэу «Турция далекая и близкая». Чэмышъо Гъазый итхылъхэу «ПсыикIыжьым илъэгъохэщхэр» ыкIи «Возвращение», М. Калмыковам истатьяу «Проблемы репатриации зарубежных черкесов в Республике Адыгея», гъэзет ыкIи журнал тхыгъэ хэутыгъабэу къэзгъэзэжьыгъэхэм ячIыгужъ ящыIакIэ зэрэщылъыкIуатэрэр къэзыIуатэхэрэр, Адыгеим къэзгъэзэжьыгъэхэр къоджакIэу Мэфэхьаблэ щагъэпсыгъэу зэрэщыпсэухэрэр, джащ фэдэу къэкIожьыгъабэхэм къуаджэу Пэнэхэс псэупIэ зэрафэхъугъэр. Дунаим итхъагъом анахь лъапIэр уихэкужъ тынчэу ущыпсэуныр, ущылэжьэныр арэу зэрэщытыр ыкIи мамырныгъэр пстэуми зэранахь лъапIэр, дышъэм зэрэпеIэрэр, мэфэкI къэгъэлъэгъоным щыкIэгъэтхъыгъ.
Дзэукъожь Нуриет.