Дунаим щызэлъашIагъ
Рамазан Абдулатиповым итхылъэу «100 вершин Расула Гамзатова» зыфиIорэм илъэтегъэуцо АР-м и Лъэпкъ музей щыкIуагъ.
Дунаим щызэлъашIэ хъугъэ дагъыстан усакIор къызыхъу-гъэр илъэси 100 мыгъэ зэрэхъущтым ехъулIэу ар къыдэкIыгъ. Ежь ышъхьэкIэ ышIэщтыгъэ поэт, тхэкIо цIэрыIом зыщыщ лъэпкъыр зэригъэлъапIэщтыгъэм, лIэшIэгъухэм къахэхыгъэ лъэпкъ шIэныгъэр зэригъэфедэщтыгъэм Рамазан Абдулатиповыр къатегущыIагъ. Политик инымрэ поэт цIэрыIомрэ зэIукIэхэу, Дагъыстан итарихъ нэкIубгъохэм атегущыIэхэу бэрэ къыхэкIыгъ. Рамазан Абдулатиповыр республикэм ипащэу зыщэт лъэхъаным Гамзатовыр зыкIэхъопсыщтыгъэ поэзием и Театрэу «Пушкиным щыублагъэу Гамзатовым нэс» зыцIэр къызэрэзэIуихышъугъэм рэгушхо. Политикэу, философэу ыкIи усакIоу Рамазан Абдулатиповым осэшхо зыфишIырэ Р. Гамзатовым ищыIэныгъэ ныбжьыкIэхэмкIэ щысэтехыпIэу зэрэщытыр хигъэунэфыкIыгъ.
Урысыем IофшIэнымкIэ и ЛIыхъужъэу МэщбэшIэ Исхьакъ Расул Гамзатовым литературнэ институтэу Москва дэтым зэрэщыдеджагъэр лъэтегъэуцом къыщиIотагъ. Авар лъэпкъэу ар къызхэкIыгъэр зэригъэлъапIэщтыгъэр къыкIигъэтхъыгъ. Гамзатовым гущыIэ гъэшIэгъонхэр, къэIокIэ ямышIыкIэхэр итворчествэ зэрэщигъэфедэщтыгъэхэр хигъэунэфыкIызэ Дагъыстан цIыкIум щыригъажьи, зэрэдунаеу заригъэшIэн зэрилъэкIыгъэр, усакIомкIэ ар лъэгэпIэ анахь инэу зэрэщытыр къыIуагъ. Зэхахьэм хэлэжьагъэхэм Расул Гамзатовым итворчествэ фэгъэхьыгъэ гупшысэ зэфэшъхьафхэр къыраIотыкIыгъэх, ифэшъуашэу къэралыгъор зэрэрыгушхорэр къаIуагъ.
Тэу Замир. Сурэтхэр авторым иех.