Адыгеим и Лъэпкъ музей непэ зэхэхьэ гъэшIэгъон щыкIуагъ.

[caption id="attachment_136935" align="aligncenter" width="800"] Сурэтыр: А. Iэшъын.[/caption]

СурэтышI IэпэIасэу Дугъ Ай­тэч иунэе сурэт къэгъэлъэгъо­нэу «Сигугъэмэ салъэкIо» зыфиIорэр мыщ къыщызэIуахыгъ. Адыгеим ихъишъэ байрэ ­илъэпкъ хабзэхэмрэ пхыры­щыгъэу сурэтышIым иIофшIэнхэр ыгъэпсыгъэх.

Iофтхьабзэр къызэIуихыгъ АР-м и Лъэпкъ музей ипащэ игуадзэу Шэуджэн Налмэс. «Адыгэхэр хэгъэгубэмэ ащэ­псэух. Ащ къыхэкIэу лъэпкъ зэфэшъхьафхэм ахэсых. Ахэм зэу ащыщ сурэтышIэу Дугъ Айтэч. Лъэпкъ шIэжьэу къыздирихьакIырэм уасэу фишIырэр къыткIэхъухьэрэ лIэужхэм ахилъхьаным фэбанэ. Айтэч иунэе сурэтхэр зыми хэкIуакIэ­хэрэп. Зэмышъогъухэу, ежь къарыпшIэжьынэу, узIэпащэу гъэпсыгъэх. Хъишъэм инэкIубгъохэм къахихыхэрэр арымэ, шIуцIэр, фыжьыр егъэфедэх, зэман бзаджэм къыхэгущыIыкIых. Тятэжъмэ ялIыгъэ, убых­хэм ягумэкIхэр, ягукIаехэр анэ­гухэмкIэ къегъэлъагъо», — еIо Н. Шэуджэным.

Дугъ Айтэч сурэтышIэ IэпэIас, зекIо шъхьафит, ыгу зэIу­хыгъ, идунае мамыр. ЦIыф ыкIи лъэпкъ зэхэдз имыIэу, изэфэдэ­хэу, пстэуми шъхьэкIафэ афе­шIы. Айтэч лъэхъаныкIэм исурэтышI, илъэпкъ иблэкIыгъэ ыгукIэ къыздырехьакIы, ащ неущ къырыкIощтым егъэгумэкIы.

Адыгэ сурэтышIэу Дугъ Айтэч Тыркуем ит къалэу Самсун 1973-рэ илъэсым къыщыхъугъ, 1989-рэ илъэсым Самсун университетым ихудожественнэ факультет чIэхьагъ. 1991-рэ илъэсым Мыекъуапэ къыгъэзэжьыгъ. А илъэсым еджэныр Тхьабысымэ Умарэ ыцIэ зыхьырэ искусст­вэхэмкIэ колле­джым щылъигъэкIотагъ. Ан­самб­лэ­хэу «Налмэсым», «Ислъа­мыем» къа­щышъуагъ. Къалэхэу Москва, Шъачэ Iоф ащишIагъ.

Дугъ Айтэч аужырэ илъэсхэм нахь зэлъашIэгъэ сурэтышI.Ащ иадыгэ чIыгужъ шIулъэгъоу фыриIэр гъунэнчъ. Адыгэ шэныр, хабзэр, лIыгъэр, намысыр, шъуашэр, шапхъэр къизыIотыкIырэ сурэтхэр цIыф­хэм аригъэлъэгъу шIоигъу.

Бжыхьэм IэпэIасэм мастер­-класс зэхищэщт. СурэтышIым икъэгъэлъэгъон шъущеплъын шъулъэкIыщт АР-м и Лъэпкъ музей.

Лъэпшъыкъо Фатим.