«Адыгэ макъэр» зэIухыгъэ къэгъэлъэгъоным рагъэблэгъагъ
АР-м и Лъэпкъ театрэу Цэй Ибрахьимэ ыцIэ зыхьырэм зичэзыу къэгъэлъэгъон гъэшIэгъон егъэхьазыры. Софокл итрагедиеу «Пачъыхьэу Эдип» зыфиIорэр Москва къикIыгъэ режиссерэу Константин Мишиным егъэуцу. АдыгабзэкIэ зэзыдзэкIыжьыгъэр Емыж МулиIэт.
[caption id="attachment_136924" align="aligncenter" width="800"] Сурэтыр: АР-м итеатральнэ объединение.[/caption]ПэшIорыгъэшъ зэIухыгъэ къэгъэлъэгъонэу щыIагъэм, Лъэпкъ театрэм шэн шIагъо зэрэфэхъугъэу, хэшыпыкIыгъэ куп зэфэшъхьафхэм ялIыкIохэр къырагъэблэгъагъэх. «Адыгэ макъэр» ахэм ащыщыгъ. АР-м итеатральнэ объединение ихудожественнэ пащэу Ацумыжъ Рустам къызэриIуагъэмкIэ, ащ фэдэ шIыкIэмкIэ къэгъэлъэгъоным рагъэплъыхэрэм спектаклыр зэрэзэхашIэрэр, агу рихьырэр, джыри уздэлэжьэжьын фэе лъэныкъохэр къыхегъэщых. НэмыкI лъэгэпIэ шапхъэхэм защиушэтыныр театрэм пшъэрылъ шъхьаIэу зыфигъэуцужьыгъ. ЗэкIэмэ анахь уасэ зиIэр къэгъэлъэгъон ужым, зэбгырымыкIыжьхэу, рагъэблэгъагъэхэр къыхагъэлажьэхэзэ, къэгъэлъэгъоным, артистхэм ярольхэр къызэрашIыгъэм, режиссерым ыгъэфедэгъэ шIыкIэхэм, шъуашэхэм, мэкъамэм лъэныкъо зэфэшъхьафэу анаIэ зытырадзагъэхэм зэратегущыIэхэрэр ары.
Къэгъэлъэгъоныр агъэхьазыры зэхъум спектаклым еплъыгъэхэм ащыщ театроведэу ыкIи критикэу, АР-м искусствэхэмкIэ изаслуженнэ IофышIэшхоу Шъхьэлэхъо Светланэ. Москва къикIыгъэ режиссерэу Константин Мишиным Софокл итхыгъэ адыгабзэкIэ зэрэзэдзэкIыгъэм къин римыгъэлъэгъоу артистхэм Iоф зэрадишIагъэр, къэгъэлъэгъоным иедзыгъохэр тхыгъэм тефэхэу зэригъэуцугъэхэр щытхъугъэкIэ ащ филъэгъугъ. «Спектаклым театрэм итруппэ зэрэщытэу пIоми хъунэу хэлажьэ, гъэшIэгъон дэдэу гъэуцугъэ, мэкъамэхэр къыхэзгъахьэрэ хорыр къекIоу гъэфедагъэ, ижъырэ орэд къэIуакIэхэр хэтых. Къэгъэлъэгъоныр цIыфхэм лъэшэу зэрашIогъэшIэгъоныщтыр джырэкIэ хэолъэгъукIы», — къыкIигъэтхъыгъ Шъхьэлэхъо Светланэ.
Ежь спектаклыр зыгъэуцугъэ К. Мишиным ныдэлъфыбзэкIэ Iоф зышIэрэ артистхэм зэрадэлэжьагъэр шIогъэшIэгъоныгъэу къыIуагъ. «КIэухым адыгабзэр къызгурыIо сыхъугъ. ЗыкIи ар сипэрыохъугъэп. Рольхэм якъэшIын артистхэм кIуачIэу халъхьэрэм, зэрэзэхашIэрэр къызэрагъэлъэгъошъурэм сынаIэ тетыгъ. Лъэпкъ театрэм «Пачъыхьэу Эдип» фэдэ щыбгъэуцуным зыщыушэтыжьыныр гъэшIэгъон дэдэу къысщыхъугъ ыкIи сызэлъиубытыгъ. Къушъхьэшхом удэкIоенышъ, укъеплъыхын, укъемыфэхэу утетышъуным ар фэд», — режиссерым иIофшIэн зыфигъэдагъэр спектаклым узеплъыкIэ къыбгурэIо.
Лъэпкъ театрэм маркетинг IофхэмкIэ иотдел ипащэу Ацумыжъ Адам пэшIорыгъэшъ зэIухыгъэ къэгъэлъэгъонхэм мэхьанэшхо аритэу хигъэунэфыкIыгъ: «Театрэр пкъынэ-лынэ псаум фэд.
Ащ икъэгъэлъэгъонхэм Iоф адапшIэ хъумэ, лъэныкъо зэфэшъхьафхэр къыдэплъытэн фае. Ащ пае зэIухыгъэ къэгъэлъэгъоным цIыф куп зэфэшъхьафхэм ялIыкIохэр къетэгъэблагъэх. Ахэр театральнэ критикых, пстэуми зэлъашIэхэу общественнэ еплъыкIэ зиIэ цIыфых, къэбар жъугъэм иамалхэм ялIыкIох, ахэтых ныбжьыкIэхэри, ныбжь чъэпхъыгъэ зиIэхэри. Шъуашэр пфэшIумэ узэрэхадэрэм узэреплъырэм фэдэу, спектаклэу агъэуцугъакIэр зрителым къызэрэщыхъурэр, джыри узхэIэзахьыжьын фэе чIыпIэу къыхафэхэрэр джащ фэдэу тэгъэунэфы».
Джы нэс тымылъэгъугъэ декорациеу зэкIоцIыкIыхэрэр, Лъэпкъ театрэм иартистхэм, зы пкъынэ-лынэ фэдэу, спектаклым иедзыгъохэм къащагъэлъагъорэ хореографиер, зэрэзекIохэрэр, мэкъамэу щыгъэфедагъэхэр, античнэ сурэтэу декорациехэм ачыIу къытехьэхэрэр, шъуашэу ащыгъхэр, рольхэр къэзышIыхэрэм кIуачIэу халъхьэрэр — а зэпстэур «Пачъыхьэу Эдип» ипремьерэу бжыхьэм щыIэщтым театрэр шIу зылъэгъухэрэм щалъэгъущт. Тыкъежэщт!
Тэу Замир.