Кушъхьэфэчъэ спортымкIэ Урысыем ичемпионат къалэу Уфа щыкIуагъ. Бзылъфыгъэхэм азыфагу зэхащэгъэ зэнэкъокъум Адыгэ Республикэм икомандэ текIоныгъэр къыщыдихыгъ.

Iофтхьабзэм зэкIэмкIи команди 6 хэлэжьагъ, Санкт-Петербург, Самар­скэ хэкум, Башкортостан, Татарстан ыкIи Адыгеим яспортсменкэхэм заушэтыгъ. Километрэ 28,6-рэ хъурэ гъогууанэр пшъашъэхэм къачъыгъ.

Адыгеим ыцIэкIэ зэнэкъокъум хэлэжьагъэх спортымкIэ мастерхэу Елизавета Ошурковар, Елизавета Арчибасовар, Гюнель Мартыновар ыкIи Таисия Чуренковар. Мы мафэм фабэр градус 30-м шIокIы­щтыгъ нахь мышIэми, мы нэбгыриплIым охътэ анахь дэгъур къагъэлъэгъон алъэкIыгъ, ащ зэкIэмкIи такъикъ 37-рэ тырагъэкIодагъ.

ЯтIонэрэ чIыпIэр Санкт-Петербург икомандэ къыдихыгъ, Самарскэ хэкум илIыкIохэр ящэнэрэ хъугъэх.

Типшъашъэхэм ыкIи ахэм ятренерэу Алексей Войновым тафэгушIо, тапэкIи гъэхъэгъэшIухэр ашIынхэу афэтэIо.