Адыгеим къэзыгъэзэжьыгъэ тилъэпкъэгъу­хэр зыщыпсэухэрэ къуаджэу Мэфэхьаблэ шышъхьэIум иапэрэ мафэ ехъулIэу кIэлэцIыкIухэм апае спортивнэ зэнэкъокъухэр щызэхащэгъагъэх.

[caption id="attachment_136851" align="aligncenter" width="800"] А. Балабась.[/caption]

Iофтхьабзэм кIэщакIо фэхъугъэх къэзыгъэзэжьыхэрэр щыIэныгъэм хэгъэгъозэжьыгъэнхэмкIэ Гупчэу Ады­геим щызэхэщагъэр, АР-м лъэпкъ IофхэмкIэ, IэкIыб къэрал­хэм ащыпсэурэ тилъэпкъэгъухэм адыряIэ зэпхы­ны­гъэ­хэмкIэ ыкIи къэбар жъугъэм иамалхэмкIэ и Коми­тет, АР-м физкультурэмкIэ ыкIи спортымкIэ и Ко­митет.

Хэкум къэзыгъэзэжьыхэрэм я Мафэ Адыгеим зыщыхагъэунэфыкIырэр мыгъэ илъэс 25-рэ мэхъу. 1998-рэ илъэсым къыщегъэжьагъэу шышъхьэIум иапэрэ мафэ ащ фэдэу хагъэунэфыкIы. Косовэ къикIыжьыгъэ адыгэхэр яхэкужъ къызэрагъэзэжьыгъэм ифэшъуашэу ар агъэнэфэгъагъ. Ахэм афашIыгъэ чылэу Мэфэхьаблэ къэралыгъо зэфэшъхьафхэм ащыпсэурэ адыгэхэр дэсых. Тыркуем, Шам, Иорданием, Израиль, Европэм икъэралыгъохэм къарыкIыжьыгъэу зэкIэмкIи нэбгырэ 2000-м ехъу Адыгеим непэрэ мафэм щэпсэух.

МэфэкIым ипэгъокIэу зихэку къэзыгъэзэжьыгъэхэм ясабыйхэм апае Iофтхьэбзэ зэфэшъхьафхэр афызэха­щэу хабзэ хъугъэ. «ГушIогъо джэгунхэр» ахэм зэу ащыщ, кIэлэцIыкIу нэбгырэ 25-рэ фэдиз зэнэкъокъу­хэм ахэлэжьагъ. Чэфым зэрихьэхэу сабыйхэр къызэпэчъа­гъэх, спорт къулайныгъэу ахэлъыр къагъэлъэгъуагъ, текIоныгъэ къыдэзыхыгъэхэм шIухьафтынхэр араты­гъэх.

Мэфэхьаблэ иадминистрацие ипащэу Хьасани Мыхьамэт къызэриIуагъэмкIэ, непэ чылэм унэгъо 83-рэ щэпсэу, зэкIэмкIи нэбгырэ 300 мэхъух, сабыеу ахэтыр нэбгырэ 70-рэ.

«Илъэс 25-рэ хъугъэ Хэкум къызыдгъэзэжьыгъэр, ар тэ тимызакъоу, адыгэу дунаим щыпсэухэрэмкIи мэхьанэшхо зиIэ тарихъ хъугъэ-шIагъэу щыт. Джы тихэку тисэу лъэпкъым итарихъ тисабыйхэм ятэгъашIэ. Хэкужъым иIаплI фабэ зэхэтэшIэ», — къыIуагъ Хьасани Мыхьамэт.

А. Балабась.