ФутболымкIэ Урысыем ипервенствэ ия 2-рэ лигэ ­хэлэжьэрэ Мыекъопэ «Зэ­къошныгъэм» мы мафэхэм зэIукIэгъоу иIагъэм текIоныгъэр къыщыдихыгъ. Мы илъэсым зэнэкъокъум апэрэу хэлэжьэрэ Ялтэ икомандэу «Рубин» къышIуихьыгъ. «Зэкъошныгъ» (Мыекъуапэ) — «Рубин» (Ялта) — 2:1 (1:1). Станицэу Павловскэм ыпэкIэ щыриIэгъэ зэIукIэгъур зышIуахьым ыуж «Зэкъошныгъэм» зэфэхьысыжь тэ­рэзхэр ышIыгъэх. Тифутболистхэм те­кIоныгъэр къыдахы зэрашIоигъор дэгъоу къэлъагъощтыгъ. ЕшIэгъум еплъыгъэхэр зэщыгъэхэп, судьям ешIакIохэм карточкэ гъожьи 10 къаригъэлъэгъугъ, нэбгыри 2 ешIапIэм ригъэкIыгъэх. Я 90-рэ такъикъым карточкэ плъыжь къырагъэлъэгъугъ Хьасанэкъо Амир, ар я 83-рэ такъи­къым ешIапIэм къихьэгъэ къодыягъ. Я 93-рэ такъикъым ятIонэрэ карточкэ гъожьыр къылэжьыгъ ыкIи ешIа-пIэм къырагъэкIыгъ «Рубин» щешIэрэ Георгий Санакоевыр. Я 23-рэ такъикъым «Зэкъошны­гъэм» икапитанэу Делэкъо Аскэр Iэ­гуаор къэлапчъэм дидзагъ. Апэрэ таймыр аухынкIэ тIэкIу къэнагъэу хьа­кIэхэм пчъагъэр зэфэдиз ашIыгъ — 1:1. Тикомандэ текIоныгъэр къы­фэзыхьыгъэ Iэгуаор я 61-рэ такъи-къым Даниил Антоненкэм дидзагъ. Мыщ дэжьым дэгъу дэдэу ешIапIэм зыкъыщигъэлъэгъуагъ Алихан Малкандуевым. Я 3-рэ турым изэфэхьысыжьхэр: «Биолог-Новокубанск» (п. Прогресс) — «Динамо (Ставрополь) — 1:0, «Кубань Холдинг» (ст. Павловскэр) — «СКА» (Ростов-на-Дону) 1:3, «Зэкъошныгъ» (Мыекъуапэ) — «Рубин» (Ялта) — 2:1 Зэнэкъокъум апэрэ чIыпIэр щызыIыгъыр «Севастополь», ащ къыкIэлъэкIох «СКА», «Рубин», «Биолог-Новокубанск», «Кубань-Холдинг», «Зэ­къошныгъ», «Динамо» (Ставрополь). КъыкIэлъыкIощт ешIэгъур «Зэкъошныгъэм» Ростов-на-Дону щыриIэщт, чIыпIэ командэу «СКА-м» IукIэщт.