ГъэхъэгъэшIухэр ашIыгъэх
Гъэмэфэ сурдлимпийскэ джэгунхэу «Тэ тызэгъус. Спорт» зыфиIорэм Адыгеим идзюдоистхэр хэлэжьагъэх ыкIи гъэхъэгъэшIухэр ашIынхэ алъэкIыгъ.
Къэралыгъо 27-мэ къарыкIыгъэ спортсменхэр Башкортостан икъэлэ шъхьаIэ щызэIукIагъэх. Iофтхьабзэм Урысыер ыкIи Адыгеир къыщызгъэлъэгъуагъэхэр олимпийскэ резервым испорт еджапIэу Кобл Якъубэ ыцIэ зыхьырэм илIыкIохэу Беданэкъо Зауррэ Инна Кибиткинамрэ. Урысыем изаслуженнэ тренерэу Беданэкъо Байзэт ыгъасэхэрэм медаль тIурытIу къахьыгъ.
Унэе зэнэкъокъухэм Беданэкъо Заур ятIонэрэ чIыпIэр къащыдихыгъ, финалым къыщытекIуагъ Дагъыстан къикIыгъэ Абдулгасан Курбановыр. Ащ ыуж Урысыем ихэшыпыкIыгъэ командэ хэтэу дышъэ медаль къыхьыгъ. Инна Кибиткинар гъогогъуитIо ятIонэрэ хъугъэ.
ГъэхъэгъэшIу зышIыгъэ тиспортсменхэм ыкIи ахэм ятренерхэм къафэгушIуагъ Адыгеим и ЛIышъхьэу КъумпIыл Мурат.