Лъэс зекIонымкIэ Урысые гъэмэфэ командэ зэнэкъокъухэр рагъэжьагъэх. Физкультурникым и Мафэ ехъулIэу ахэр зэхащэх. Мыгъэ шышъхьэIум и 12-р ары ар зыхагъэунэфыкIыщтыр.

Урысыем спортымкIэ иминистрэу Олег Матыциным зэрилъы­тэрэмкIэ, физкультурникым и Мафэ пстэуми зэдыхагъэунэфыкIырэ мэфэкIэу шIыгъэн фае. Бэдзэогъум и 28-м рагъэжьэрэ Урысые зэнэкъокъухэр шышъхьэIум и 12-м нэс кIощтых. Нэбгыри 5-м щегъэжьагъэу нэбгырэ 20-м нэс зыхэхьэрэ командэ 428-рэ ахэм ахэлэжьэщт.

Адыгэ Республикэм икомандэу «Мыекъуапэ 01-м» ащ фэдэ зэнэкъокъухэм гъэрекIо текIоныгъэ къащыдихыгъ. Мыекъуапэ щыщ нэбгырэ 20 ащ хэхьэ: Бзэго Рустам (капитан), Светлана Пихтеревар, Щэбан Асиет, Ирина Пыловар, Светлана Строгановар, Сергей Федоровыр, Ренат Ягудиныр, Дзыбэ Рузанэ, Елена Зезюкинар, Оксана Киракосян, Хьажъокъо Маринэ, Дмитрий Валявскэр, Мэрэтыкъо Анзор, Олег Колосовскэр, Надежда Михальцовар, Ольга Кривец, Надеж­да Пеньковскаяр, Джармэкъо Аслъан, Мария Донсковар, Псэун Назир.

Командэ зачетым халъытэщтыр зэнэкъокъум хэлажьэрэ пэпчъкIэ зы мафэм ыдзыгъэ лъэбэкъу 25000-м емыхъоу ары. ТекIоныгъэр къыдихыщт нахьыбэ зыкIугъэ командэм. Лъэбэкъу пчъагъэр зэфэдиз зыхъукIэ, нэбгырэ нахьыбэ зыхэт командэр ары текIуагъэкIэ алъытэщтыр. Унэе зачетымкIэ текIоныгъэ къыдэзыхыщтыр зэнэкъокъухэр зыщыкIорэ мафэхэм лъэбэкъу нахьыбэ зыдзыщтыр ары.