ТIотэжьын, зытыужьыжьын
Ащ фэдэу нэмыкI хэгъэгухэм ащыпсэурэ адыгэмэ ахахьэзэ, ежь къызэриIорэмкIэ, кассетишъэ хъун ыугъоигъ. Ахэр конычIэм ригъэкIугъэхэу щысэп «икъун сшIагъэр» ыIоу, къыхеутых, радиом, телевидение къэтынхэу «Джэныкъо машIу», «Нартхэр» зыфиIохэрэм къащеIуатэх.
Тэ Адыгэ телевидением теплъынэу амал тиIагъэп, ау бэшIагъэу радиор къытэнэсы, джы интернетым ихьатыркIэ Адыгэ телевидениеми теплъынэу амал дгъотыгъэ. Асфар икъэтынмэ ащыщхэр кассетэмэ атетхагъэхэу къытIэкIахьэхэу хъугъэ, лъэшэу тшIогъэшIэгъоныгъэх, ау мэкIагъэх. Джы Ютубым уихьэмэ, Асфар илъэс тIокIым къыкIоцI къышIыгъэ къэтынхэр шъэм ехъоу тэлъэгъу, тяплъы, тикIалэхэри ятэгъэплъых. Ау гукъао хъурэр уахътэр лъыкIуатэ къэс адыгабзэкIэ гущыIэрэр, ар къызыгурыIорэр нахь макIэ зэрэхъурэр ары. Миллион заулэ тыхъоу Тыркуем тис, ау бзэр къызIунэжьыгъэр макIэ, тэ, нахьыжъыхэмкIэ тызытекIыкIэ, хэт ахэмэ ядэIужьыщт, нартхэри, адыгэм идунэезэхашIи хэт ыгу къэкIыжьыщт…
Асфар итхылъэу «ПхъапкIэмэ ралъэсэхыжьы» зыфиIорэм МыгъолI Садыкъ къыриIуагъэу къытхыжьыгъэр сыгу итIысхьагъ, сщыгъупшэрэп, хьакIэщхэу тимыIэжьмэ тазэрафэныкъор зэхэсэшIэ.
«ТиIагъэх хьакIэщхэр хэбзэр чIэлъэу, бзыпхъэр къычIэкIэу, — еIо МыгъолI Садыкъ. —Щыгъу, пIастэм ихьатыркIэ хьакIэр хьакIэщым еблагъэу щытыгъ. Iоф зиIэм къырихьылIэти, Iофышхо щызэшIуахыщтыгъ. ХьакIэщыпчъэр сятэ зыфешIыжьым, джы а пчъэ цIыкIоу фашIыжьыгъэм адыгэхэм тызэлъымыкIожьэу, тызэрэмышIэжьэу тыкъыгъэнагъ…».
Джы сызэрегупшысэрэмкIэ, а хьакIэщэу зэфашIыжьыгъэм щамыIотэжьырэ къэбархэр ибэм фэдэу гъогу зэпырыкIыпIэмэ къатенагъэх, пшыпыжьынхэ пIуагъэкIи зэбгъэуIужьышъунхэп… Угъоигъэу тиIэр ары къытфэнагъэр, арышъ, Асфар фэдэу лъэпкъ къэбархэр зыугъоижьыгъэмэ, ахэр цIыфмэ къахэзыщэжьырэмэ ашIэрэм осэ икъу фэтшIын фае. Ащ икъэбармэ сядэIу зыхъукIэ, тыцIыкIоу тятэжъмэ тхыдэжъхэр къытфаIуатэ зыхъукIэ тигуапэу тызэрядэIущтыгъэр, хьакIэщ къэбармэ тызэраумэхъыщтыгъэр сыгу къэкIыжьы.
Илъэсхэр кIуагъэу, кIэлэ ныбжьыкIэу зыкъызытэIэтым ыуж ХьэдэгъэлIэ Аскэр Тыркуем, Сирием, Израиль, Америкэм фэдэ хэгъэгумэ адыгэмэ защыIуигъакIэзэ зэфихьысыгъэ нарт къэбархэр зыдэт тхылъхэр сэ сшъхьэкIэ къысIэкIахьэхэ хъугъэ. Ар зэрэхъугъэри къэсIон. Москва радиом араб хэгъэгумэ арыс адыгэмэ апае къэтынхэр рекIокIыщтыгъэх, Бэк Козэт ыгъэхьазырыщтыгъэх. Сэ адыгабзэ сIулъыгъэп икъоу, ау тхэкIэ-еджакIэ, мыхъэтэ дэдэми, къызIэкIэзгъэхьагъэу щытыгъ.
Израиль адыгэмэ ащыщэу Шэуджэн Лусян иадрес къысIэкIэхьагъэу, сятэ къыIомэ, сэ стхызэ тызэфатхэу щытыгъ. Москва радиом сыфэзыгъэтхагъэри Лусян арыгъэ. Козэт сызыфатхэм, ар 1971-рэ илъэсыр арыгъэ, нарт къэбархэр зыдэтхэ томиблым иапэрэ томэу къыдэкIыгъэр къысфигъэхьыгъ. Ащ сэ сызэригъэгушIуагъэр къэсIон слъэкIынэп, хэкужъым тыфэныкъуагъэба, ау тызэрэадыгэм пае къин тыхэтыгъ, тыкъэтхэнэу къытфадэщтыгъэп.
Тхылъэу къысфагъэхьыгъэм псынкIэу сыхэплъагъ, сшIогъэшIэгъон дэдагъ, тижъымэ къаIуатэщтыгъэ тхыдэмэ ахэт цIэхэр а тхылъ дэдэми итыгъэх. Сыгу зэрэтэмэогъагъэр джы къызнэсыгъэми сщыгъупшэжьырэп. Козэт тхьаегъэпсэу томхэр къыдэкIы къэс къысфигъэхьыгъ. А лъэхъаным уеджэнэу тхылъ бгъотыщтыгъэп, бгъотыгъэми пIэкIэлъагъо хъущтыгъэп. Хэти тхылъ IэкIэлъмэ, фаем еджэнэу шъэфэу, гъэбылъыгъэкIэ ритэу хэбзагъэ. Тхылъхэр зием IукIэжьыщтыгъэп, зэIэпахэу хэгъэгур къакIухьэщтыгъ. СитомиплI Алахьым ешI зыдэщыIэр... Тэ тиуахътэ нарт къэбармэ ателэжьыхьан кIалэхэр къытхэкIыгъэх. Ахэм ащыщыгъ абэзэ кIэлэ шIагъоу Исмел Оздэмыр Озбай. «Мифологиемрэ нартхэмрэ» зыфиIорэ тхылъыр 1990-рэ илъэсым къыдигъэкIыгъ. Нарт Лъэпшъ, нарт Саусэрыкъо, Сэтэнэе гуащэ, нэмыкIыбэми къатегущыIэ. Козэт фэдэу Оздэмыри дунаим ехыжьыгъ, Алахьым джэнэтым щерэгъэгупсэфых.
Тыркуер тIэкIу нахь «къызэушъэбым, Адыгэ хасэхэм конференциехэр, зэхэсыгъохэр зэхащэхэ хъугъэ. Ащ дакIоу Хъуажъ Фахьри журналхэр къыдигъэкIыгъэх, Оздэмыри Фахьрии Хэсэ тхьэматэу тиIагъэх. Лъэпкъым пае ахэм афэдэ псэемыблэжьмэ ашIагъэр къэIотэжьыгъуай.
Адыгэ телевидением къэбархэр интернетым къыритхэу зыфежьэм, ахэми тащыгъуазэ хъугъэ, зэдэгущыIэгъу программэхэри къыредзэх, тяплъы, тядэIу. Асфар дашIырэ гущыIэгъухэми «тиныбджэгъу къихьагъ» тэIошъ, тигуапэу тяплъы, ащ фэдэ цIыф шIагъом нэIуасэ сызэрэфэхъугъэм сырэгушхо.
Тхыдэжъ аIоу къытфаIуатэщтыгъэхэр лIэшIэгъу минхэр къызэпачи тэ къытлъыIэсыгъэх. Адыгэр IорIуатэкIэ гъэшIэгъон, «лъапсэр пытэу щымытыгъэмэ ахэр тыдэ къитхыжьыныех?» сэIо. Ахэр къытлъыIэсыжьыгъэх, ау ямэхьанэ лъэпкъымкIэ къеIыхы, бзэр зэрэкIодырэм ар къыхэкIы. «Шъупылъыгъа?» пIомэ, тыпылъыгъ, тыпылъ ыкIи амал зэрэтиIэкIэ.
Бзэм изэгъэшIэн нахь псынкIэ цIыфмэ къафэхъуным ыуж зетфэзэ, мафэ горэм Пчэнлъэшъу Мэмдухь (Дюзджэ щэпсэу) къысфытеуагъ, тырку пшъашъэ горэ Сибэл Кутлук ыцIэу адыгабзэкIэ Дюзджэ университетым щеджи къызэриухыгъэр къысиIуагъ. «Адыгабзэр неущ «кIодыжьыщт» еIошъ, ыпсэ IокIы, Анкара дэс, уадэжь къакIомэ удеIэмэ сигопэн» ыIуагъ. Пшъашъэр къакIуи адыгабзэр аригъэхьэу зыфежьэм, гуапэ зэрэтщыхъугъэм гъуни нэзи иIэп. Ар Анкара дэкIыжьынэу зэхъум, Барцо Сулиет къакIуи зы лъэхъани ащ аригъэхьыгъ адыгабзэр. Тиныбджэгъоу ЛIыцIэ Джахьид къытхэтыгъ пенсием фэкIуагъэу. «Сэ адыгэ факультетым сычIэмыхьэмэ хъущтэп» ыIощтыгъ. Шъыпкъэ, чIэхьагъ ыкIи.
Хьаткъор, сэры, Убых Сэит, ЛIыцIэр, Хъуажъ Булент аIоу зэхэсыгъо заулэ итхыгъ, зыгорэхэр шIэгъэн фэягъэ, ущыскIэ хъун щыIэп. Шъыпкъэр пIощтмэ, Хьаткъом тыщигъэсыщтыгъэп. Фэтэр горэ тыубытынэу итхъухьагъ, ау пандемиер къежьи унэмэ такъырымыкIышъоу уахътэ тешIагъ. ЛIыцIэр ятIонэрэ курсым ихьагъэу къэсымаджи, дунаим ехыжьыгъ, Тхьэм джэнэт къырет.
Адыгэ факультет учIэхьан хъумэ е Дюзджэ, е Къайсыр университетмэ адэжь укIон фае. Ахэр къэзыухыгъэхэр тиIэ хъугъэх, ахэм Хьаткъор ялъэIумэ тезисэу атыхэрэр къаригъэхьымэ ателэжьыхьэу ыублагъ. Бзэ зэгъэшIэным ифэIо-фашIэхэр зэкIэ зэшIуихынэу фежьагъ. Ар ащ пылъызэ, зэрэкупэу Дюзджэ тыкIуагъ. Бзэ Хасэм итхьаматэу Пчэнлъэшъу Мамдухь зыIудгъэкIагъ, Хасэм икъутамэ Анкара къыщызэIутхынэу тетыубытагъ, къызэIутхыгъ ыкIи. Ащыгъум Анкара Черкес Хасэм итхьамэтагъэр Жылэкъо Бислъан арыгъэ. Тхьаегъэпсэу, къыддеIагъ.
Мы зэкIэ къызкIэстхырэр Асфар фэдэ лIы губзыгъэу къытфэнэжьыгъэмэ ягущыIэ чылапхъэ фэдэу лъэпкъым къыхэнэжьынэу тыфаешъ ары. Ар къыддэхъуным пае бзэр къэтыухъумэн, «О мардж!» тIон фае. Бзэр щыIэмэ, хабзэри, бзыпхъэри дгъотыжьыных. Адыгэм «Уадыгэба?!» пIоу зепIокIэ, непи къеубыты, шIолIыкIы, зэрэхъурэмкIэ хабзэр джыри щыI, лъым зэрэхэлъ, къэбгъэущыжьыныр ары ищыкIагъэр.
Тиныбджэгъу нахьыкIэу, Абхъаз заоми щыIи хэкум кIожьыгъэ Ацумыжъ Хьилми (ХьылымкIэ щеджэх) ишIогъэшхо къытигъэкIыгъ бзэ IофымкIэ. Ежь къыдигъэкIыгъэ гущыIалъэ къытфигъэхьыгъ. Арыти, а гущыIалъэмрэ адыгабзэм изэхэф гущыIалъэу Адыгеим къыщыдагъэкIыгъэмрэ зэсыдзэкIыхи, адыгэбзэ-тыркубзэм ислъхьагъэх. Ар хъугъэу зытлъытэкIэ, тхылъыр къыдэкIына е интернетым къырагъэхьана — сшIэрэп, ау игъогу техьан. Ар тэ тфашIэрэр ары, джаущтэу зэкIэми тызэхэIабэмэ, зыгорэ къыддэхъун сэIо.
ЕтIанэ Къуекъо Асфар ихьакIэщ иджэныкъо машIо тыщыгупсэфынышъ, нарт къэбарыжъмэ тядэIун. Пчыхьэ къэс къэбарыжъмэ таумэхъызэ тызэхэсмэ, адыгэ ябынкIэ зыкъэдгъотыжьын.
Сэгугъэ, тэгугъэ Асфар зыгъэныбджэгъухэу непэ IэкIыб щыIэхэмкIэ «Джэныкъо машIор» ымыгъэкIосэжьэу, ымыгъэплъыкъожьэу джыри тыкIэлъыригъэсынэу. ХьакIэр зэрикIасэр тэшIэшъ, джа хьакIэщыпчъэу тятэмэ зэфашIыгъагъэхэр къызэIутигъэхыжьынхэшъ, адыгэрэ адыгэрэ тызэлъыкIоу, тызэрэшIэжьэу тыкъызэхэнэн, Тхьэм ыIомэ, тIотэжьын, зытыужьыжьын.
Джащ фэдэ гупшысэ IэшIухэр къысфахьых Къуекъо Асфар икъэтынхэм…
Мэфэуд Хъайри. ТхакIо, орэдыIу, Адыгэ хасэмэ якIэщакIу.