Анахь дэгъухэм ащыщ
Урысыем итеатрэ зэфэшъхьафхэр зыхэлэжьэрэ зэнэкъокъу инэу «Звезда театрала» зыфиIорэ щытхъуцIэр кIэухым зыщафагъэшъуашэрэм АР-м и Лъэпкъ театрэ хэлажьэ.
Зэнэкъокъум иапэрэ едзыгъо пхырыкIи, Адыгэ театрэр къэралыгъом ианахь лъэпкъ театрэ дэгъуи 10-мэ ясатырэ хэуцуагъ.
Театрэр шIу зылъэгъухэрэм, ащ икъэгъэлъэгъонхэм яплъыхэрэм зыцIэ къыраIорэ театрэхэр ары апэрэ едзыгъом хахьэхэрэр. Зэнэкъокъум лъэныкъо зэфэшъхьафхэр къыделъытэ: анахь къэгъэлъэгъон дэгъур, бзылъфыгъэ ыкIи хъулъфыгъэ рольхэр анахь дэгъоу къэзышIыгъэхэр, театрэм иактерэу е иактрисэу кином анахь роль дэгъу къыщызышIыгъэхэр, анахь режиссер дэгъур, шъолъыр ыкIи лъэпкъ театрэ анахь дэгъухэр, театрэм исоциальнэ проект анахь дэгъур ыкIи нэмыкIхэр.
Анахь мэкъабэ зыфатыгъэхэр ятIонэрэ едзыгъом пхырэкIых. ГущыIэм пае, къэнзалхэм, бурятхэм, удмуртхэм, якутхэм, осетинхэм ялъэпкъ театрэхэр а пчъагъэм хэхьагъэх. Гъэмафэр екIыфэ хъытыум иамалхэмкIэ цIыфхэм якIэсэ театрэхэм амакъэхэр джыри афатыщтых. Iоныгъом ашIыщт зэфэхьысыжьхэмкIэ зэнэкъокъум иедзыгъо пэпчъ театрэ щырыщ къырагъэнэщт.
«Звезда театрала» зыфиIорэ щытхъуцIэр зыфагъэшъошэщт театрэхэр зэнэкъокъум икIэухым мэфэкIэу тыгъэгъазэм и 4-м Вахтанговым ыцIэ зыхьырэ театрэу Москва дэтым рагъэблэгъэщтых. ШIоигъоныгъэ зиIэхэр, АР-м и Лъэпкъ театрэ зикIасэхэр, мы хъытыу нэкIубгъом ихьанхэшъ, амакъэхэр фатынхэ алъэкIыщт https://teatral-online.ru/star/longlist/.