Урысыем ипщынэо IэпэIасэщтыгъэу, композиторэу Геннадий Заволокиным ишIэжь фэгъэхьыгъэ я VII-рэ Дунэе фестивалэу «Играй, гармонь любимая!» зыфиIоу Новосибирскэ щыкIуагъэм Адыгеим ипщынэо IэпэIасэу Унэрэкъо Аскэрбый хэлэжьагъ. Адыгеим ыцIэ мэкъэмэ дахэкIэ зыгъэIугъэ пщынаом ыдэжь «Адыгэ макъэр» щыIагъ.

[caption id="attachment_136682" align="aligncenter" width="800"] Сурэтыр: А. Унэрэкъом ихъарзынэщ.[/caption]

ЗыцIэ къетIогъэ зэнэкъокъум щагъэнэфэгъэ кубкэхэм ащыщэу «Урысыем, Кавказым ыкIи Адыгеим япщынэо IэпэIас» зыфиIорэ шIухьафтыныр Аскэрбый къыдихыгъ. ХэгъэунэфыкIыгъэн фае мы зэнэкъокъум типщынао я 4-у зэрэхэлажьэрэр. Мызыгъэгум ащ Урысые Федерацием ишъо­лъыр зэфэшъхьафхэм ямыза­къоу, Iэ­кIыб къэралыгъуабэхэми яIэпэIасэхэр къекIолIэгъагъэх.

Унэрэкъо Аскэрбый къызэрытфиIотагъэмкIэ, фестивалым къекIолIагъэхэм япчъагъэ зэрэбэ дэдагъэм къыхэкIыкIэ, хьакIэщхэм ачIэмыфэхэу, щагухэм ащафашIыгъэ бгъагъэхэм ачIэсыгъэх.

— Пщынэо 7 000 фэдиз фестивалым хэлэжьагъ, лъэпкъ мэкъэмэ гъэшIэгъонхэр къыщырагъэIуагъ. Сэ сыусыгъэ орэдэу «Чёрные глаза» зыфиIоу Урысыем дэгъу дэдэу щызэлъашIэ хъугъэр ыкIи адыгэ ижъырэ мэкъамэхэр фестивалым къыщезгъэIуагъэх. Орэдыр сэ стхыгъэми зымышIэщтыгъэ цIыфхэу фестивалым къекIолIагъэхэр лъэшэу Iэгу къысфытеуагъэх, къыдэшъуагъэх. Ар хэгъэкIи, джыри къэсIожьынэу къыкIэлъэ­Iущтыгъэх, — еIо Аскэрбый.

[caption id="attachment_136683" align="aligncenter" width="800"] Сурэтыр: А. Унэрэкъом ихъарзынэщ.[/caption]

Джыри ныбжьыкIэ дэдэу, илъэс 14 нахь ымыныбжьэу, Адыгеим, Мэздахэ щырагъэкIо­кIыгъэгъэ зэнэкъокъоу «Играй, гармонь любимая!» зыфиIорэм Аскэрбый хэлэжьэнэу хъугъэ. Геннадий Заволокиным апэрэу ащ нэIуасэ щыфэхъугъагъ. «Урысыем щызэлъашIэрэ пщынэо IэпэIасэр апэрэу ащыгъум слъэ­гъугъэ. Тянэ къекIуалIи, пщынэм сишъыпкъэу сызэрэпылъын фаер риIуагъ, сыкъызэрахигъэщыгъэр сигопагъ», — ыгу къэкIыжьы Аскэрбый.

Щытхъур къэзылэжьыгъэ IэпэIасэр 1988-рэ илъэсым щегъэ­жьагъэу 2022-рэ илъэсым нэс лъэпкъ культурэм фэлажьэзэ, шъолъыр зэнэкъокъу зэфэ­шъхьафхэм ахэлэжьагъ ыкIи текIоныгъэхэр къащыдихыгъ. Джы пщынэо ныбжьыкIэхэр егъасэх, IэпэIэсэныгъэу хэлъымкIэ адэгуащэ.

— ХэзгъэунэфыкIынэу сыфай «Адыгеим ижъогъожъыехэр» зыфиIорэ фестивалым иедзы­гъоу Шэуджэн районым щыкIуагъэм сэ згъэсэрэ кIэлэцIыкIоу ЛъэпцIэ­рыкъо Бислъан шIухьафтын шъхьаIэр къызэрэщыдихыгъэр, — зэрэрыгушхорэр къыхэщэу Аскэрбый къыIуагъ. — Сэри сезыгъэджэгъэ кIэлэегъэджэ цIэрыIом ыцIэ къесIонэу сыфай — Темзэкъо Алый ихьатыркIэ адыгэ пщынэм ишъэфхэр къыс­IэкIэхьагъэх».

Джащ фэдэу лъэпкъ культурэм ихахъо фэлажьэзэ, «Шэуджэнхьаблэ ипщынаохэр» зыфиIорэ проектым илъэситф хъугъэу Унэрэкъо Аскэрбsй дэлажьэ. Дзыбэ Мыхьамэт, Быщтэкъо Азэмат, Жэрэкъо Пщымаф, ГутIэ Бислъан, Едыдж Пщымаф, нэмыкIхэри ащ хэтых, зэIокIэхэшъ, адыгэ пщынэм идесэхэр ныбжьыкIэхэм арагъашIэх.

ХэгъэунэфыкIыгъэн фае илъэс 12-рэ зэпымыоу, сыд фэдэ зэ­нэ­къокъу хэлэжьагъэми, Аскэр­бый текIоныгъэр къызэрэдихыщтыгъэр. Урысыем ипщынэо анахь IэпэIасипшIым ар ахэт. Пщынаохэмрэ хьатыякIохэмрэ язэнэкъокъоу шышъхьэIум и 20-м Улапэ щыкIощтым Аскэрбий хэлэжьэнэу зыфегъэхьазыры. Типщынэо IэпэIасэ джыри гъэ­хъэгъэшIухэр ышIынхэу фэтэIо.

Лъэпшъыкъо Фатим. Сурэтыр: А. Унэрэкъом ихъарзынэщ.