Къуекъо Асфар Сахьидэ ыкъор — тхакIо, Адыгэ Республикэм изаслуженнэ журналист, филологие шIэныгъэхэмкIэ доктор, общественнэ IофышI, къулыкъушIэуи щытыгъ, спортым пылъыгъ… Iофыгъохэу ар зыхэлэжьагъэу, гъэхъэгъэ гъэнэфагъэхэр зыщишIыгъэхэм якъэпчъын джыри лъыбгъэкIотэн плъэкIыщт. КIэкIэу къэпIон хъумэ, лэжьэкIошху, зыфежьэрэ Iофыр щысэтехыпIэу зэшIуихыныр нэшэнэ шъхьаIэ фэхъугъэу игъашIэ къырэкIо.

Телекъэтын-къэгъэлъэгъон пчъагъэмэ зэрахэлэжьагъэм нэмыкIэу, нартхэм афэгъэхьыгъэу къэтын- къэгъэлъэгъонхэр япчъагъэкIэ 100 хъухэу ыгъэхьазырыгъэх. Шъузэрэщыгъуазэу, мы дунаим лъэпкъ мин 800-м къыщыублагъэу мини 2-м нэсэу тетэу къалъытэ. Арэущтэу зыкIэхъурэр къэралыгъохэм зэкIэми цIыфышъхьэтхыныр тэрэзэу ащызэхащэрэпышъ ары. Сыдэущтэу къэлъытагъэу хъугъэми, эпос зиIэ лъэпкъхэм япчъагъэ 10-м емыхъоу ары. Ахэм адыгэхэр ащыщых. Гушхуагъэ къытхелъхьэ. Илъэс мин пчъагъэхэм лъэпкъым зэпыугъо фимышIэу тилъэхъанэ къынэсыфэ къытфиухъумэгъэ нарт эпосыр чIэтынэ хъухэнэу щытэп. ГухэкI тинарт эпос щыщ къэбархэр тихьакIэщхэм, тиунагъохэм макIэу къызэращыIухэрэр. Къуекъо Асфар Адыгэ телевидением еплъыхэрэр «ихьакIэщ» къыригъэблэгъагъэх. Ежьыри, къэтын-къэ­гъэлъэгъоным дэлажьэхэрэми эпос къэбархэр цIыфхэм зэралъыбгъэIэсыщт шIыкIэшIу къыхахыгъ. Асфар таурыхъIотэ Iазэу къычIэкIыгъ, ащ блэкIэу, зэрэшIэныгъэлIым къыхэкIэу, нарт къэбарым имызакъоу, ащ икъэхъукIи, имэхьани, ыкупкIи еплъыхэрэр щегъэгъуа­зэх. Ахэм ямызакъоу, джы зэрэдунаеу нарт эпосым икъэбархэм зыщагъэгъозэнэу амал агъотыгъ, сыда пIомэ Къуекъом ителекъэтын-къэгъэлъэгъонхэр дунэе хъытыум ратIупщыхьагъэх. ТызэрэхаплъэрэмкIэ, мы IофшIагъэр IофшIэгъэшху, лъэпкъымкIэ уасэу иIэр ин тIомэ, джыри зэхэшIэгъуае. Ау узэмыджэнджэшыжьыщтыр зы — адыгэ лъэпкъым иэпос щыгъэ­гъозэгъэнхэмкIэ, къыткIэхъухьэрэмэ зэрагъэшIэнымкIэ зишIуагъэ къэкIорэ лэжьыгъэшху. Арышъ, Къуекъо Асфар икъэгъэлъэгъон-къэтынхэм тиреспубликэ и Къэралыгъо шIухьафтын фэбгъэшъуашэмэ хъунэу тэлъытэ.

Тэу Нуриет, бзэшIэныгъэлэжь.