СурэтышIым исыхьат зэIухыгъ
[caption id="attachment_136619" align="aligncenter" width="800"]
Ф. Лъэпшъыкъу[/caption]
АР-м исурэт къэгъэлъэгъуапIэ Iофтхьэбзэ гъэшIэгъон зэхищагъ. Мыр зычIэт унэм ичIэхьапIэ сурэтышIэу Иваненко Светланэ мастер-класс къыщитыгъ.
Гъэмафэм ижъот шъыпкъ, жьы къабзэм ухэсэу сурэт пшIыным игъо дэд! ЦIыфэу сурэтшIыныр зикIасэхэм заушэтын амал яIагъ. СурэтшIыным инепэрэ шапхъэмэ атетэу къалэм итеплъэ, ащ иунэ лъагэхэр, иурам занкIэхэр тхьапэм ебгъэкIушъуныр IэпэIэсэныгъэм щыщ.
Апшъэрэ категорие зиIэ кIэлэегъаджэу Иваненко Светланэ илъэс щэкI хъугъэу черчениемрэ сурэтшIынымрэ арегъэхьы. ИIэшIагъэхэм якъэгъэлъэгъон джыдэдэм ащ щэкIо, ахэр зэзыгъэлъэгъу зышIоигъо цIыфыбэ щызэблэкIы. ЯтеплъэкIи ашъохэмкIи къызэкIухэу, къалэм илъэгъо гъунапкъэхэр гъунэнчъэу, дэхагъэм уфащэу IэпэIасэм исурэтхэр шIыгъэх. Къэгъэлъэгъоным искусствэм идунай зэрэхищэхэрэм имызакъоу, ежь-ежьырэу сурэт ашIын амал къекIолIагъэхэм яIагъ. Къэлэм ыкIи акварель шъо зэмылIэужыгъохэр агъэфедэзэ Iоф ашIагъ. Светланэ сурэтышI Iазэу зэрыщытым нэмыкIэу, кIэлэегъэджэ IупкIэу къычIэкIыгъ, сурэтым егъэжьапIэ фэхъущтыр Iэрыфэгъоу къекIолIагъэхэм къагуригъэIуагъ.
Джащ фэдэу АР-м изаслуженнэ сурэтышIэу Бырсыр Абдулахь цIыфэу къэкIуагъэхэм сурэтшIынымкIэ IэпыIэгъу афэхъущтыгъ, IэпэIасэр сурэтшIыным ишъэфхэмкIэ адэгощагъ.
Светланэ къызэрэтиIуагъэмкIэ, непэ мы Iофтхьабзэр игуапэу ригъэкIокIыгъ. Пшъэрылъ шъхьаIэу зыфигъэуцугъэр къыдэхъугъ. Архитектурэм къыхэхыгъэ тхыпхъэ зэфэхьысыжьыр дахэу акварель техникэм къызэрекIурэр къыгъэнэфагъ. СурэтшIынымкIэ мыщ фэдэ сыхьатхэр къэлэдэсхэм апае зэхащэхэзэ ашIымэ, ар зышIогъэшIэгъоныбэ къекIолIэщт. Ныбжьым емылъытыгъэу заушэтын амал яIэщт. .