Актрисэ цIэрыIоу, РСФСР-м изаслуженнэ артисткэу, Адыгеим инароднэ артисткэу, Мыекъуапэ ицIыф гъэшIуагъэу ШъхьакIумыдэ Нуриет Сэлым ыпхъум идунай ыхъожьыгъ.

Искусствэм зиIахьышхо хэзышIыхьэгъэ, общественнэ IофышIэу щытыгъэ, ныбжьыкIэхэр зыдэзыгъэсэгъэ, зиIоф хэшIыкIышхо фызиIэгъэ цIыф шIагъом илъэси 102-рэ фэдиз къыгъэшIагъ. ЩыIэныгъэ гъогу гъэшIэгъон къэзыкIугъэ бзылъфыгъэ зэчыишIум нэбгыришъэ пчъагъэмэ агу ыщэфыгъ.

ГИТИС-р къызэриухэу ШъхьакIумыдэ Нуриет фронтым ащэгъагъ, концерт бригадэм хэтыгъ. 1943-рэ илъэсым Мыекъуапэ шъхьафит зашIыжьым, актрисэ гохьым ащ къыгъэзэжьи, итворчествэ щылъигъэкIотагъ.

Илъэс 15 ыныбжьэу театрэ IофшIэным пыхьэгъэгъэ ШъхьакIумыдэ Нуриет лIэшIэгъуныкъом ехъурэ театрэм Iоф щишIагъ, цIыфхэм лъэшэу агу рихьыщтыгъ. Актрисэм IэпэIэсэны­гъэшхо хэлъэу роль 200-м ехъу къы­шIыгъ. Исэнэхьат зэрэфэшъыпкъагъэр, нэгум къыкIигъэуцоу рольхэр дэгъоу къызэришIыщтыгъэхэр ары цIыфхэм актрисэ цIэрыIор шIу зыкIалъэгъущтыгъэр, лъытэныгъэшхо зыкIыфашIыщтыгъэр.

***

Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ лъэшэу гухэкI ащыхъугъ РСФСР-м изаслуженнэ артисткэу, Адыгэ Республикэм инароднэ артисткэу ШъхьакIумыдэ Нуриет Сэлым ыпхъум идунай зэрихъожьыгъэр ыкIи щымыIэжьым иунагъорэ иIахьылхэмрэ афэтхьаусыхэх.

IэпэIэсэныгъэшхо зыхэлъыгъэ бзылъфыгъэр уи Хэгъэгурэ Iофэу узпылъымрэ узэрафэшъыпкъэн фаемкIэ ренэу щысэтехыпIэу щытыгъ. ШъхьакIумыдэ Нуриет ТекIоныгъэшхор къыдэзыхыгъэхэм ащыщ. Хэгъэгу зэошхор къызежьэгъэ апэрэ мафэхэм къащыублагъэу фронтовой бригадэм хэтыгъ, зэо ужым итворческэ гъогу республикэ гупсэм щылъигъэкIотагъ, депутатэу щытыгъ, ныбжьыкIэхэм ишIуагъэ аригъэкIыгъ.

ШъхьакIумыдэ Нуриет ыгуи ыпси етыгъэу Iоф ышIагъ. Театральнэ искусствэм республикэм зыщегъэушъомбгъугъэнымкIэ, Адыгеими, Урысыеми якультурэ къэухъумэгъэнымкIэ ыкIи хэхъоныгъэ егъэшIыгъэнымкIэ ащ бэ ышIагъэр.

ШъхьакIумыдэ Нуриет егъашIэм шIукIэ тыгу илъыщт.

***

Адыгэ Республикэм культурэмкIэ и Министерствэ, Адыгеим, КъБР-м, КъЩР-м ялъэпкъ тхакIоу, Урысыем IофшIэнымкIэ и ЛIыхъужъэу МэщбэшIэ Исхьакъ лъэшэу гухэкI ащыхъугъ РСФСР-м изаслуженнэ артисткэу, Адыгэ Республикэм инароднэ артисткэу ШъхьакIумыдэ Нуриет Сэлым ыпхъум идунай зэрихъожьыгъэр ыкIи щымыIэжьым иунагъорэ иIахьылхэмрэ афэтхьаусыхэх.

Тыгухэм шIукIэ къарынэщт

ШъхьакIумыдэ Нуриет идунай зэри­хъожьыгъэм фэгъэхьыгъэ шъыгъо зэхахьэ А.Пушкиным ыцIэ зыхьырэ унэм тыгъуасэ щыкIуагъ.

Республикэм щызэхэщэгъэ театрэхэм яартистхэр, къэралыгъо хабзэм ыкIи общественнэ къулыкъухэм ялIыкIохэр, культурэм иIофышIэхэр, ШъхьакIумыдэ Нуриет игупсэхэр, иIахьылхэр, илъэс пчъагъэхэм ныбджэгъушIоу иIагъэхэр зэхахьэм къыщызэрэугъоигъэх.

АР-м культурэмкIэ иминистрэу Аулъэ Юрэ, Урысыем IофшIэнымкIэ и ЛIы­хъужъэу, лъэпкъ тхакIоу МэщбэшIэ Исхьакъ, КъокIыпIэм щыпсэурэ лъэпкъхэм яискусствэкIэ къэралыгъо музеим и Темыр-Кавказ къутамэ ипащэу Шъэуап­цIэкъо Аминэт шъыгъо зэхахьэм хэлэжьагъэх. Лъэпкъ культурэм, театральнэ искусствэм чIэнэгъэшхо зэрашIы­гъэр къэгущыIагъэхэм зэкIэми хагъэунэфыкIыгъ. Зидунай зыхъожьыгъэ актрисэ цIэ­рыIор исэнэхьат фэшъыпкъэу, лъэпкъ культурэр къыгъэбаеу, ащ ижъогъо шъып­къэу зэрэщытыгъэр къаIуагъ.

Урысыем итеатральнэ IофышIэ­хэм я Союз иреспубликэ къутамэ ипащэу Зыхьэ Заур ШъхьакIумыдэ Нуриет артист ныбжьыкIэхэмкIэ ыкIи зэкIэ театрэм Iоф щызышIэхэрэмкIэ щысэтехыпIэу зэрэщытыгъэр, ащ фэдэу къызэрэнэжьыщтыр хигъэунэфыкIыгъ. Актер сэнэхьатым общественнэ IофшIэнэу дихьыщтыгъэм ыпкъ къикIыкIэ КПСС-м ипартийнэ комитетэу театрэм щызэхэщэгъагъэм исекретарэу, Мыекъуапэ, Адыгэ хэкум, Краснодар краим ядепутатхэм я Советхэм охътэ зэфэшъхьафхэм ахэтыгъ, гъэхъагъэ хэлъэу ащылэжьагъ, щытхъуцIэ пчъагъэ къылэжьыгъ.

Шъыгъо зэхахьэм къекIолIагъэ­хэм ШъхьакIумыдэ Нуриет иаужырэ гъогу агъэкIотэжьыгъ. Тхьэм джэнэт лъапIэ къырет.