ДзюдомкIэ Мыекъопэ еджапIэр зэхэзыщагъэу, СССР-м изаслуженнэ тренерэу, я ХХ-рэ лIэшIэгъум итренер анахь дэгъоу Кобл Якъубэ Къамболэт ыкъом ишIэжь фэгъэхьыгъэ я Х-рэ Урысые зэнэкъо­къур Адыгеим щыкIуагъ.

Адыгэ къэралыгъо университетым спортымкIэ и Унэшхоу тренер цIэрыIом ыцIэ зыхьырэм ар щызэхащагъ. Тихэгъэгу ишъо­лъыр 19-мэ къарыкIыгъэ бэна­кIохэр зэнэкъокъум хэлэжьагъэх.

ДзюдомкIэ Олимпиадэхэм ахэ­лэжьэщтхэр зыщагъэхьазырхэрэ Мыекъопэ спорт еджапIэу Я. Къ. Коблым ыцIэ зыхьырэм испорт­сменхэм медали 4 ащ къыщыдахыгъ.

Килограмм 90-м нэсыхэрэмкIэ Датхъужъ Алый чемпион хъу­гъэ. Килограмми 100-м ехъу къэ­зыщэчыхэрэмкIэ Бэгъ Аслъан дышъэ медалыр къыхьыгъ.

Килограмм 66-м нэс къэзыщэчыхэрэмкIэ ЦIыкIу Рэмэзан, килограмм 90-м нэс къэзыщэ­чыхэрэмкIэ Ингуш Владимир джэрз медальхэр къафагъэшъошагъэх.

Краснодар краим ыцIэкIэ бэнэгъэ тичIыпIэгъоу ЛIышэ Хьаруни килограмм 60-м нэс къэзыщэ­чыхэрэмкIэ зэнэкъокъум ичемпион хъугъэ. Санкт-Петербург ыцIэкIэ бэнэгъэ Къушъхьэ Джамбулати килограмм 81-м нэс къэ­зыщэчыхэрэмкIэ тыжьын медалыр къыдихыгъ.

Спортсменхэми, ахэр зыгъасэхэрэми гъэхъагъэхэр зэрашIыгъэ­хэмкIэ тафэгушIо, текIоныгъакIэ­хэр тапэкIи ашIынэу тафэлъаIо!