ЦIыфыбэ яплъыгъ
Адыгэ Республикэм и ЛIышъхьэ ишIухьафтын илъэу футболыр шIу зылъэгъухэрэм ячемпионат Адыгеим къыщызэIуахыгъ.
Республикэм икъалэхэм ыкIи ирайонхэм якомандэхэр ащ хэлажьэх. Джэгунхэр шэкIогъум и 19-м нэс республикэм истадион зэфэшъхьафхэм ащыкIощтых. Апэрэ чэзыум иешIэгъухэр блэкIыгъэ зыгъэпсэфыгъо мафэхэм щыIагъэх. Адыгэ къэралыгъо университетым икомандэ Шэуджэн районым икомандэу «Нартым» Хьакурынэхьаблэ ешIэгъу щыдыриIагъ.
ФизкультурэмкIэ ыкIи дзюдомкIэ Адыгэ къэралыгъо университетым и Институт ипащэу Ахътэо Руслъан къызэриIуагъэмкIэ, зэIукIэгъур гъэшIэгъонэу кIуагъэ. Университетым ифуболистхэм пчъагъэр 3:1-у текIоныгъэр къыдахыгъ. Апэрэ чэзыум ыуж хагъэунэфыкIырэ чIыпIэхэр зыубытыгъэхэм Тэхъутэмыкъуае ыкIи Красногвардейскэ районхэм якомандэхэм ягъусэу тифутболистхэр хэуцуагъэх.
Зэнэкъокъухэм язэхэщакIор физкультурэмкIэ ыкIи спортымкIэ Адыгэ Республикэм и Комитетрэ футболымкIэ АР-м и Федерациерэ. КъыкIэлъыкIорэ зэIукIэгъухэр зыщыкIощт мафэхэр ыкIи чIыпIэхэр агъэнафэх.