Бэдзэогъум и 21-м щегъэжьагъэу и 23-м нэс республикэм икъэлэ шъхьа­Iэ ар щыкIощт.

Проектым ипащэу Виталий Карякиным зэха­хьэр къызэIуихыгъ. Искусствэхэм хэхъоныгъэ ягъэ­шIыгъэнымкIэ мысатыушI организацием ар ипащ. Адыгеим ящэнэрэу кинофестивалыр щызэхащэнэу зэрэхъугъэр ащ хигъэунэфыкIыгъ. Зэнэкъокъу-фес­тивалым хэлажьэх къэ­ралыгъо зэфэшъхьафмэ ярежиссерхэм тырахыгъэ фильм гъэшIэгъонхэр. «Зэнэкъокъу-къэгъэлъэ­гъоным хэлажьэмэ ашIоигъоу нэбгырэ шъищмэ яфильмхэр къагъэхьыгъэх, ахэм ащыщэу 18-р анахь дэгъоу къыхэтхыгъ ыкIи ахэр фестивалым къы­щыдгъэлъэгъощтых», — къы­Iуагъ Виталий Карякиным.

Пшъэрылъ шъхьаIэу зэ­нэкъокъум иIэр режис­сермэ ясэнаущыгъэ къы­хэгъэщыгъэныр, яIоф фэгъэчэфыгъэнхэр, ыпэкIэ нахь рагъэхъун алъэкIыным иамалхэр ягъэгъотыгъэныр ары. Джащ фэдэу ныбжьыкIэмэ ясэнэхьат гъэхъагъэхэр щашIынымкIэ IэпыIэгъу афэхъугъэныр, фильм кIаком ижанрэ зыкъегъэIэтыгъэныр — зыдэлэжьэгъэн фэе лъэныкъохэу зэхэщакIохэм къыхагъэщыгъэх.

Фестивалыр Мыекъуапэ щызэхэщэгъэнымкIэ IэпыIэгъу афэхъугъ гуманитар ушэтынхэмкIэ рес­публикэ институтым инаучнэ IофышIэ шъхьаIэу Агъыржьэнэкъо Симэ. Ащ зэрэхигъэунэфыкIыгъэмкIэ, мыщ фэдэ фестивальхэр Адыгеим нахьыбэрэ щырекIокIхэмэ, IэкIыб хэгъэгухэми, Урысыеми арыс лъэпкъхэм нахь ты­зэлъашIэщт. Режиссер ныб­жьыкIэхэм лъэтегъэуцо ар афэхъущт.

Адыгеим ицIыф пэ­рытхэм ащыщэу, Пшызэ шъолъыр космонавтикэмкIэ и Федерацие иапэрэ президентэу, шIэныгъэлэжьэу Трахъо Энвер фэ­гъэхьыгъэ фильмэу «Человек Земли» зыфи­Iорэм фестивалыр къызэIуихыгъ. Фильмым ирежиссер Сергей Мазоль­никовыр. Джащ фэдэу Адыгеим ицIыф цIэрыIохэм афэгъэхьыгъэ документальнэ фильмэ 15 зэ­рэтырахыгъэр Виктор Карякиным хигъэунэфыкIыгъ. Шъолъырым, тицIыфхэм ацIэ къазэращыраIорэм имызакъоу, гъэсэныгъэ мэхьэнэ куу ахэм зэряIэр къыкIигъэтхъыгъ.

Мэфищрэ кIощт фестивалым къыщагъэлъэгъощт фильмхэм Адыгеим щы­псэухэрэр ыкIи ихьакIэхэр яплъынхэ алъэкIыщт.