Адыгеим мысатыушI организациеу щызэхащагъэхэм ащыщэу къэралыгъо IэпыIэгъоу грантхэр къизыхыгъэхэм ар къэзыушыхьатырэ тхылъхэр «Мой бизнес» зыфиIорэ Гупчэм щаратыжьыгъэх.

Социальнэ Iофхэм апылъ мыса­тыушI организацие 30-мэ гражданскэ обществэм зегъэу­шъомбгъугъэным фэшI грантхэр ятыгъэнхэм фытегъэпсыхьэгъэ зэнэкъокъум текIоныгъэр къыщыдахыгъэу АР-м IофшIэнымкIэ ыкIи социальнэ хэхъоныгъэмкIэ и Министерствэ зэзэгъыныгъэм адыкIэтхагъ. Ащ ипащэу Мырзэ Джанбэч Iофтхьабзэр къызэIуи­хызэ, мы грантхэм кIэщакIо афэхъугъэхэм зэрафэразэхэр къыхигъэщыгъ. Илъэс къэс мысатыушI организациеу ахэм ахэ­лажьэхэрэм япчъагъэ хэхъо, къэралыгъом IэпыIэгъоу къаритырэм ишIуагъэкIэ ахэм яIофшIэн шIуагъэу къытырэр нахьыбэ мэхъу.

— АР-м и ЛIышъхьэ пшъэрылъ къытфишIыгъэу гражданскэ обществэм зегъэушъомбгъугъэным пае грантэу къэралыгъом ыгъэнэфа­гъэхэм якъыдэхынкIэ зэнэкъокъум нахьыбэу зэрэхэлэжьэщтым тыпылъ, — къыIуагъ министрэм. — Илъэс заулэу ар зыщыIэм сомэ миллиони 100 фэдиз ащ фэдэ IэпыIэгъоу социальнэ Iоф­хэм апылъ мыса­тыушI организациеу тиIэхэм аIэкIэхьагъ. Ар макIэп, ау тапэкIэ джыри нахьыбэу лъэIу тхылъхэр къатынхэу тыфай.

Мыщ фэдэ организациеу республикэм щатхыгъэр 500-м ехъу. Мыгъэ 40 хэлэжьагъ, 30-мэ къырахыгъ. ТапэкIэ джыри нахь чанэу грантхэм якъыдэхынкIэ зэнэкъокъум къыхэлэжьэнхэм, муниципальнэ образованиехэм яорганизациеу тхылъхэр къэзытыхэрэр нахьыбэ хъунхэм зэрэщыгугъыхэрэр Мырзэ Джанбэч къыхигъэщыгъ.

Грант къизыхыгъэу нэужым дипломхэр министрэм зэритыжьыгъэхэм ащыщых заом, IофшIэным, УIэшыгъэ КIуачIэхэм ыкIи хэбзэухъумэкIо къулыкъу­хэм, медицинэм иIофышIэхэм ясоюзхэу АР-м щызэхащагъэхэр, мысатыушI организациехэу «Къэзэкъ культурэм ишъолъыр фестиваль», «Турист Адыгеи», «Волшебный фонарь», «Белая река» зыфиIохэрэр, баскетболымкIэ, акробатикэмкIэ, фехтованиемкIэ АР-м ифедерациехэр, нэмыкIхэр.

Джащ фэдэу зэнэкъокъум илъэныкъоу «Лъэпкъ ыкIи дин зэгурыIоныгъэр гъэпытэгъэныр» зыфиIорэмкIэ текIоныгъэр къы­дихыгъ ыкIи диплом къыратыгъ мысатыушI организациеу

«Черкесская медиаплатформа» зыфиIорэм. Ащ ипащэу ЛIыхъукIэ Айдэмыр гущыIэгъу тызыфэ­хъум, тиныдэлъфыбзэ зегъэ­ушъом­бгъугъэным фытегъэпсы­хьэгъэ проектэу кIэщакIо зыфэ­хъухэрэм япхырыщынкIэ ащ фэдэ IэпыIэгъум ишIогъэшхо къызэрэкIорэр къыхигъэщыгъ.

— Мы грантым лъэшэу тежагъ, тыщыгугъыгъ, сыда пIомэ тапэкIэ тиIофшIэн зэрэзэхэтщэщтыр бэкIэ ащ епхыгъ. Арышъ, лъэшэу тафэраз IэпыIэгъум кIэщакIо фэхъугъэхэми, зэнэкъокъум тыхэлэжьэным ищыкIагъэ­хэм ягъэхьазырынкIэ къыддеIагъэхэми. Къы­хэзгъэщымэ сшIоигъу, нэмыкI субъектхэми мыщ фэдэ зэнэкъокъум тащыхэлажьэу хъугъэ, ау Адыгеим Iофхэр къызэрэщытфагъэпсынкIэ­хэрэм, къызэрэщыддеIэ­хэрэм фэдэ зыпарэкIи тырихьылIагъэп.

Айдэмыр тызэрэщигъэгъозагъэмкIэ, «Адыгабзэр зэтэгъа­шIэ» зыцIэ проектэу зэнэкъо­къум хагъэлэжьагъэм сомэ мил­лионым ехъу грантэу къыратыщт. Iофэу ашIэрэр лъагъэ­кIотэным пае шэпхъэшIухэм адиштэрэ шIыгъэ оборудование дэгъу къащэфыным ар пэIуагъэ­хьащт.

«Черкесскэ медиаплатформэм» урысыбзэкIэ кIэлэцIыкIу­хэм апае къыдагъэкIырэ мульт­фильмэхэр адыгабзэкIэ щызэрадзэкIых.

ХЪУТ Нэфсэт. Сурэтхэр: Iэшъынэ Аслъан.