С. М. Джэнчатэм ыцIэ зыхьырэ спорт еджа­пIэу N 1-м боксымкIэ иотделение испортзал зэрагъэцэкIэжьырэр Мыекъуапэ имэрэу Ген­надий Митрофановым ыуплъэкIугъ.

Зигугъу къэтшIыгъэ залыр гурыт еджапIэу N 7-м ищагу дэт.

КъалэмкIэ ар мэхьанэшхо зиIэ хъугъэ-шIагъэу щыт, сыда пIомэ боксыр ныбжьыкIэхэм анахь якIэсэ спорт лъэпкъхэм ащыщ. Мы залым гъэцэкIэжьынхэр зыкIи рашIылIэгъагъэп.

КъэIогъэн фае боксымкIэ мыекъопэ еджапIэм спортсмен цIэрыIуабэ зэрэщагъэсагъэр, республикэмкIэ анахь пэрытэу ар зэрэщытыр.

Залыр зэдагъэпсэолъэнэу ыкIи ащ игъэцэкIэжьынкIэ мыбюджет мылъкур агъэфедэнэу игъо зы­лъэгъугъэр шъолъыр общественнэ организациеу «Адыгэ Рес­публикэм боксымкIэ ифедераций» ары. Адыгэ Республикэм и ЛIышъхьэу КъумпIыл Мурат ащ къыдыригъэштагъ ыкIи проектыр зэрагъэцэкIэщт амалхэр къагъотыгъэх. ГъэцэкIэжьынхэм ялъэ­хъан унашъхьэр зэблахъунэу, ыкIоцIкIи, ыкIыбкIи агъэдэхэнэу, вентиляторыкIэхэмрэ спорт Iэмэ­псымэхэмрэ рагъэуцонхэу ра­хъухьэ.

«ТеплъакIэ зиIэщт залыр ти­спортсмен ныбжьыкIэхэм агу ри­хьынэу, тапэкIэ чемпион хъущт­хэр мыщ щагъэсэнхэу сэгугъэ», — къыIуагъ Мыекъуапэ имэр.

ИкIэухым Геннадий Митро­фановым зэрэхигъэунэфыкIы­гъэмкIэ, бокс зыщешIэхэрэ залэу агъэкIэжьырэр ныбжьыкIэхэр спортым нахьыбэу пыщэгъэнхэм фэIорышIэщт.