Урысые зэнэкъокъу
Командэу «Мыекъуапэ 01» зыфиIорэм Урысые гъэмэфэ зэнэкъокъум хэлэжьэнэу зегъэхьазыры. Физкультурникым и Мафэ ехъулIэу ар зэхащэ.
[caption id="attachment_136322" align="aligncenter" width="800"] Командэм хэтхэр зэгъусэхэу гъатхэм атырахыгъэ сурэт.[/caption]
Зигугъу къэтшIыгъэ купым испортсменхэр къэлэ зэнэкъокъухэмрэ марафонхэмрэ ахэлэжьагъэх. Ахэм бэшIагъэу лъэсэу къакIухьэ.
Бэдзэогъум и 28-м къыщегъэжьагъэу шышъхьэIум и 12-м нэс Iофтхьабзэр кIощт. Команди 100 заулэ ащ хэлэжьэщт. Мафэ къэс лъэбэкъу 25000-рэ акIунэу спортсменхэм загъасэ. Мыщ фэдэ зэнэкъокъур бэмэ зэрашIогъэшIэгъоныр апэрэ мафэм командэ 50-мэ ялъэIу тхылъхэр къызэрэрахьылIагъэм къегъэлъагъо.
Командэу «Мыекъуапэ 01»-м ишъыпкъэу зэнэкъокъум зыфегъэхьазыры, мафэ къэс тиспортсменхэм тренировкэхэр арагъэшIы, лъэбэкъу пчъагъэу ашIыгъэр къалъытэ.
Тикомандэ мыщ фэдэ зэнэкъокъухэм ащатекIоу хъугъэ. Джыри текIоныгъэ къыдихынэу зытырегъэпсыхьэ. Командэм хэт пэпчъ спортым псауныгъэмкIэ мэхьанэшхо зэриIэр къыгурэIо.
«Мыекъуапэ 01»-м Урысые зэнэкъокъум гъэхъагъэхэр щишIынэу фэтэIо!