ЯщыкIэгъэ IэпыIэгъур арагъэгъоты
Къэралыгъо программэу «Тилъэпкъэгъухэу IэкIыб къэралыгъохэм ащыпсэухэрэр ежьхэм яшIоигъоныгъэкIэ Адыгэ Республикэм къэкощыжьынхэмкIэ IэпыIэгъу афэхъугъэныр» зыфиIорэр пхырыщыгъэным иIофыгъохэм афэгъэзэгъэ межведомственнэ комиссием зэхэсыгъо иIагъ.
[caption id="attachment_136267" align="aligncenter" width="800"] Сурэтыр: АР-м кощын IофхэмкIэ и ГъэIорышIапI.[/caption]Iофтхьабзэр зэрищагъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр. Зэхэсыгъом хэлэжьагъэх министрэхэм я Кабинет ыкIи къулыкъу зэфэшъхьафхэм ялIыкIохэу комиссием хэтхэр.
АР-м хэгъэгу кIоцI IофхэмкIэ и Министерствэ кощын IофхэмкIэ и ГъэIорышIапIэ иотдел ипащэу ХьапэкIэ Рузанэ, Шъхьэлэхъо Аскэр зэхахьэм докладхэр къыщашIыгъэх. Тиреспубликэ къэзыгъэзэжьыгъэ тилъэпкъэгъухэр щыIэныгъэм зэрэхэгъозэжьхэрэм, IэпыIэгъу афэхъугъэнымкIэ зэхэщэн Iофтхьабзэу зэрахьэхэрэм ахэр къатегущыIагъэх.
[caption id="attachment_136268" align="aligncenter" width="800"] Сурэтыр: АР-м кощын IофхэмкIэ и ГъэIорышIапI.[/caption]Мы къэралыгъо программэм 2023-рэ илъэсым имэзихэу пыкIыгъэм изэфэхьысыжьхэм къатегущыIагъ ХьапэкIэ Рузанэ. Ащ къызэриIуагъэмкIэ, программэм хэлажьэ ашIоигъоу IэкIыбым щыщхэм ялъэIу тхылъ 20 фэдиз ГъэIорышIапIэм къыIэкIэхьагъ. Ахэр Абхъазым, Шам, Тыркуем, Казахстан, Германием, Киргизием, Туркменистан, Таджикистан, Молдовэм ицIыфых. Программэм хэлажьэрэр ыкIи ащ иунагъо Адыгеим ишъолъыр къыхиубытэрэ муниципальнэ образование ыкIи къалэу зыфаем щыпсэун фит. Лъэпкъ тхылъ 20-у къатыгъэм щыщэу програмэм хэлэжьэнхэ фитэу нэбгырэ 11-мэ ащ фэдэ Iизын аратыгъ, нэбгыри 9-мэ ятхылъхэр афызэкIагъэкIожьыгъ. Къэралыгъо программэм Iоф зишIэрэм къыщыублагъэу тилъэпкъэгъу нэбгырэ 76-рэ (нэбгырэ 23-рэ, унэгъо 53-рэ) Адыгеим къэкIожьыгъэхэу щэпсэух, ахэм зэкIэми социальнэ IэпыIэгъу аратыгъ.
Тилъэпкъэгъухэр къэкощыжьынхэм кIэгъэгушIугъэнхэм, ахэр мы щыIэныгъэм хэгъэгъозэгъэнхэм афэшI цIыфхэм IофшIэн ягъэгъотыгъэнымкIэ къэралыгъо къулыкъум программэ гъэнэфагъэ зэхигъэуцуагъэу Iоф ешIэ.
Комитетым итхьаматэу Шъхьэлэхъо Аскэр къызэриIуагъэмкIэ, Урысые Федерацием ипрограммэ диштэу мыгъэ яплIэнэрэ илъэс хъугъэу тэ тишъолъыри ар щагъэцакIэ. Къэралыгъо программэм ипхырыщын фэгъэзэгъэ къулыкъу пстэуми зэзэгъыныгъэхэр адашIыгъэх. Программэр зыфэIорышIэрэр IэпэIэсэныгъэ ин зыхэлъ тилъэпкъэгъухэу IэкIыб къэралыгъохэм ащыпсэухэрэм тишъолъыр къагъэзэжьын, республикэм исоциальнэ-экономикэ хэхъоныгъэ яIахьышIу хашIыхьаныр ары.
Ащ къызэриIуагъэмкIэ, 2023-рэ илъэсым тилъэпкъэгъу нэбгырэ 60-мэ (программэм хэлажьэхэу нэбгырэ 15-мэ, унэгъо 45-мэ) Адыгеим псэупIэкIэ къагъэзэжьынэу щыт. Анахьэу ахэм псэупIэкIэ Мыекъуапэ, Тэхъутэмыкъое, Адыгэкъалэ, Мыекъопэ районыр къыхахых. Мыщ фэгъэхьыгъэу мы илъэсым имэзихэу пыкIыгъэм программэм хэлажьэхэрэм якъыхэхынкIэ комиссием зэхэсыгъуи 7 фэдиз зэхищагъ.
2023-рэ илъэсым имэзихэу пыкIыгъэм нэбгырэ 31-рэ (нэбгыри 10 ыкIи ахэм яунэгъо 21-рэ) программэм хэлажьэх. Ахэм ащыщэу нэбгыри 5-р кIэлэеджакIох, 2-р кIэлэцIыкIу IыгъыпIэм макIох, нэбгыри 4-р пенсионерых. Программэм хэлажьэхэрэм анахьыбэр Казахстан, Туркмением, Таджикистан, Шам, нэмыкIхэми къарыкIыгъэх.
Комитетым итхьаматэ къызэрэхигъэщыгъэмкIэ, АР-м ихэбзэ гъэцэкIэкIо къулыкъухэр, Адыгеим иобщественнэ организациехэр зэгъусэхэу тилъэпкъэгъухэм ясоциальнэ-гуманитар гумэкIыгъохэр зэшIуахых. Ахэм псэупIэхэр, IофшIэпIэ чIыпIэхэр ягъэгъотыгъэнхэмкIэ, документхэр афагъэпсынхэмкIэ ящыкIэгъэ IэпыIэгъу арагъэгъоты. Адыгеим нахь ищыкIэгъэ кадрэхэу къыхагъэщыгъэх медицинэм иIофышIэхэр, гъэсэныгъэм пылъхэр, лъэныкъо зэфэшъхьафхэм афэгъэсэгъэ инженерхэр, менеджерхэр. Джащ фэдэу тилъэпкъэгъухэм ясабыйхэр кIэлэцIыкIу IыгъыпIэхэм агъэкIонхэ алъэкIыным лъэшэу анаIэ тырагъэты, ащкIэ гумэкIыгъо щыIэп. ЗищыкIагъэхэм зэкIэми ыпкIэ хэмылъэу медицинэ IэпыIэгъур арагъэгъоты.
Зихэкужъ къэзыгъэзэжьыгъэхэр щыIэныгъэм хэгъэгъозэжьыгъэнхэмкIэ мэхьанэшхо зиIэхэм ащыщ зыщыпсэущтхэ унэхэр зэрагъэгъотынхэр. Программэм игъэцэкIэн къызэрэдыхэлъытагъэу, тичIыпIэгъухэм ежь яахъщэ халъхьэзэ псэупIэхэр ащэфынхэ алъэкIыщт. Джащ фэд, хэбзэгъэуцугъэу щыIэм къыпкъырыкIыхэзэ, программэм хэлажьэхэрэм IофшIэпIэ чIыпIэхэр ежьхэм къызфагъотыжьын алъэкIыщт.
Анахь гумэкIыгъо шъхьаIэу Комитетым ипащэ зигугъу къышIыгъэр республикэм нахь ищыкIэгъэ IофшIапIэхэр, ахэм ащыщ врач сэнэхьатыр, арагъэгъотын мурад яIэу тилъэпкъэгъухэр Адыгеим къызырагъэблэгъэжьхэкIэ, Тэхъутэмыкъое районым щэпсэух нахь мышIэми, къалэу Краснодар кIохэзэ Iоф ашIэ. Социальнэ тынэу щыIэхэр мыхэм зэкIэми республикэм ареты, ащ емылъытыгъэу, ежьхэм нэмыкI къалэхэм Iоф ащашIэ. Ар къызхэкIырэм лъапсэ имыIэу щытэп, ау ахэм афэдэ IофышIэхэр Адыгеим зэрищыкIагъэхэм анаIэ тырагъэтын ыкIи хэкIыпIэхэм алъыхъунхэ зэрэфаер къыIуагъ Шъхьэлэхъо Аскэр.
Зэхэсыгъом зыщыхэплъэгъэхэ Iофыгъохэм япхыгъэ унашъохэм япроектхэм хэплъэнхэу аштагъэх.
КIАРЭ Фатим.