Урысые физкультурэ-спорт комплексэу «IофшIэнымрэ зыухъумэжьынымрэ сафэхьазыр» зыфиIорэм изичэзыу тхьамафэ бэдзэогъум и 24-м къыщегъэжьагъэу и 30-м нэс Мыекъуапэ щыкIощт.

Мы Iофтхьабзэм хэлажьэ зышIоигъохэм ныбжьэу яIэм елъытыгъэу шапхъэхэр затын алъэкIыщт мафэр ежь-ежьырэу къыхахын амал яI. Дышъэ, тыжьын е джэрз тамыгъэ бгъэхалъхьэхэр къызыфагъэшъошэщтхэр шIокI зимыIэ ушэтыни 4-рэ ежьхэм къыхахыгъэ ушэтыни 2-рэ гъэхъагъэ хэлъэу зытыхэрэр ары. Республикэ стадионэу «Зэкъошныгъэм» пчэдыжьми, пчыхьэми шапхъэхэр щатынхэ алъэкIыщт.

Бэдзэогъум и 21-м нэс зэнэкъокъум хэлажьэ зышIоигъохэм ялъэIу тхылъхэр аштэщтых. Ащ фэгъэхьыгъэ къэбархэр нахь игъэ­кIотыгъэу муниципальнэ образованиеу «Къалэу Мыекъуапэ» физическэ культурэмкIэ ыкIи спортымкIэ и Комитет инэкIубгъоу социальнэ хъытыоу «ВКонтакте» зыфиIорэм щыриIэм рагъотэнхэ алъэкIыщт. Хабзэ зэрэхъугъэу, Урысые физкультурэ-спорт комплексэу «IофшIэнымрэ зыухъумэжьынымрэ сафэхьазыр» зыфиIорэр бэдзэогъум иаужырэ тхьамафэ зэхащэ. Къэлэдэсхэр ащ чанэу хэлажьэх.