Футбол цIыкIумкIэ зэнэкъокъоу Гъобэкъуае щыкIуагъэм Теуцожь районым ис лIэкъуи 7-мэ къахэкIыгъэхэм зы­щау­шэтыгъ.

Тхьаркъохъо, Шэуджэн, Нэхэе, Уджыхъу, Теуцожь, Хъот, ГъукIэлI лIакъохэр ары ащ хэлэжьагъэхэр. Такъикъи 10 зырызрэ кIогъэ едзыгъуитIукIэ ахэр зэнэкъокъугъэх.

Нэхэе, Шэуджэн лIакъохэр атекIохи, финалым ихьагъэх. Я 3-рэ чIыпIэм икъыдэхын пае Тхьаркъуахъохэмрэ Хъотхэмрэ зэнэкъокъугъэх.

Тхьаркъуахъохэр 8:1-у Хъотхэм атекIуагъэх. Финалым щызэнэкъокъу­гъэхэмкIэ 4:2-у Нэхаехэм текIоныгъэр къыдахыгъ. Шэуджэнхэм я 2-рэ чIыпIэр афагъэшъошагъ. Апэрэ чIыпIищыр зыхьыгъэхэм щытхъу тхылъхэмрэ ахъщэрэ аратыгъэх.