Бэдзэогъум и 12-м щегъэжьагъэу и 17-м нэс орэдымрэ къашъомрэ я Дунэе фестивалэу «Кавказыр ыкIи зэрэдунай орэмамыр» зыфиIоу Тыркуем икъалэу Яловэ щыкIорэм ансамблэу «Мыекъуапэ инэфылъэхэр» хэлажьэ.

[caption id="attachment_136035" align="aligncenter" width="800"] Сурэтыр: Д. ХьакIэцIыкIу[/caption]

Мрамор хы Iушъом щызэрэугъоигъэх Кавказ щызэлъашIэрэ орэдыIо ыкIи къэшъокIо купхэр. Фестивалыр рагъэкIокIыным къалэу Яловэ игубернатор кIэщакIо фэхъугъ ыкIи мы къалэм щылэжьэрэ Темыр Кавказ обществэм ар зэхищагъ.

Апэрэ мафэм фестивалым хэлажьэхэрэр нэIуасэ зэфэшIыгъэнхэм япхыгъэ зэIукIэхэр ра­­гъэкIокIыгъэх. ЯтIонэрэм къе­кIолIэгъэ цIыф купышхор зэхэтэу Яловэ игъогумэ арыкIуагъ. Къэ­лэ гузэгум къашъохэр къыщашIыгъэх. Ащ къыкIэлъыкIоу чIыпIэ зэIухыгъэмэ къэшъуакIохэм якъэгъэлъэгъонхэр ащыкIуагъэх. Купым къэшъо дахэхэу «Къа­фэр», «Лъэпэрышъор», «НыбжьыкIэ къашъор» къалэу Яловэ исценэ къыщашIыгъэх.

Ансамблэм зэIукIэгъу дыри­Iагъ мы къалэм имэрэу Мустафа Тутук. «Мыекъуапэ инэфы­лъэхэм» япащэу, Урысыем культурэмкIэ изаслуженнэ Iофы­шIэу, Адыгеим изаслуженнэ артистэу Нэныжъ

Айдэмыр зэIукIэм къыщиIуагъ: «Ти Адыгей ищытхъу тилъэпкъ къашъохэмкIэ тыди щызэлъядгъашIэ тшIоигъоу лъэшэу тиIоф тегугъу, купым хэтхэми ягулъытэ мы лъэныкъом­кIэ къызэрэтIэтыщтым тынаIэ тет. Дунаим мамырныгъэ илъэу цIыфхэр псэунхэр анахь шъхьа­Iэу щыт».

Ящэнэрэ мафэм къэшъокIо купыр хьакIапIэ щыIагъ адыгэ чылэу Соуджакъ. Мэфэ реным купыр чIыпIэ гъэшIэгъонмэ къа­щыращэкIыгъ. СыхьатиплI адыгэ джэгум хэлэжьагъэх. Чылэу Со­уджакъ къэшъокIо купэу иIэхэр ащ къекIолIагъэх. Нэбгырэ 500-м ехъоу къэзэрэугъоигъэхэр чэщ хъугъэу зэхэкIы­жьыгъэх.

ЯплIэнэрэ мафэм, непэ, дагъыстан чылэу Гюней макIох, къэшъо къэгъэлъэгъон къыщатыщт. Пчыхьэзэхахьэу ашIыщтым адыгэ джэгу къыдыхэлъытагъ, ялъэпкъ емылъытыгъэу, къэшъо­ным ыбзэ ахэр благъэ зэфишIыщтых.

Фестивалым иаужырэ мафэ изэфэшIыжьын тегъэпсыхьагъэу амфитеатрэм исценэ къэгъэлъэ­гъонхэр щыкIощтых, гала-концертэу ар зэраухыжьыщтым тиансамблэ къэшъуищ къыщигъэ­лъэгъощт.

Лъэпшъыкъо Фатим.