Усэн-тхэн Iофышхор фызэшIокIы
Адыгэхэр Кавказым ис лъэпкъыжъхэм ащыщых. Ащ ехьылIагъэу къэпIон хъумэ, акъыл-губзыгъагъэр икъу фэдизэу лъэпкъым зэрэзыIуищагъэм ищысэ ин адыгэхэм яфольклор.
Ар ылъапсэу адыгэ литературэр къызэкIэхъухьагъ, нэмыкI лъэпкъ литературэхэу зылъапсэ илъэси 100 заулэкIэ, минкIэ къалъытэхэрэм ащымыщэу ныбжьыкIэми, тилитературэ шъуаши пкъы пыти ыгъотыгъ, АР-м итхакIохэм, усакIохэм гуетыныгъэ ин творчествэм фыряIэу зызэрагъэулэугъэм ишыхьат жанрэ зэфэшъхьафхэр ащкIэ дэгъу дэдэу аIэ къызэрэрагъэхьагъэхэр.
Я ХХ-рэ лIэшIэгъум иапэрэ ныкъом адыгэ литературэм зы бзылъфыгъэ тхакIу хэтыгъэр — Натхъо Долэтхъан. Я 60 — 90-рэ илъэсхэм лъэпкъ литературэм къыхэхьагъэх Хъунэго Нуриет, Емыж МулиIэт, Ергъукъу-ЩэшIэ Щамсэт, Хъунэго Саидэ, Гъыщ Рахьмэт, Мамрыкъо Фатимэ ыкIи непэ зигугъу къэтшIыщт ГутIэ Санят. Бзылъфыгъэ акъылыр, гупшысэр, фэбэгъэ-шъэбагъэр, сакъыныгъэ-зэфагъэр лъэныкъуабэкIэ адыгэ литературэм ифэныкъогъагъ ыкIи тилитературэ ахэм нахь къагъэбжьышIуагъ.
ГутIэ Санят Красногвардейскэ районым ит къуаджэу Адэмые бэдзэогъум и 14-м, 1961-рэ илъэсым къыщыхъугъ. Адыгабзэр дэгъоу зыщашIэу, зыщагъэфедэрэ унагъом щапIугъ. Гурыт еджапIэр къызеухым, якъоджэ колхоз ибригадэ зы илъэсрэ Iоф щишIагъ, 1980-рэ илъэсым Адыгэ къэралыгъо кIэлэегъэджэ институтым филологиемкIэ ифакультет чIэхьагъ, дэгъу дэдэуи къыухыгъ. Зы илъэс еджэгъу Хьатикъое гурыт еджапIэм адыгабзэмрэ адыгэ литературэмрэкIэ ыкIи урысыбзэмрэ урыс литературэмрэкIэ щыригъэджагъэх. 1986-рэ илъэсым Адыгеим и Къэралыгъо телерадиокомпание рагъэблэгъагъ: выпускающэу ригъажьи, илъэс зэфэшъхьафхэм тематическэ ыкIи къэбархэмкIэ программэхэм яредакторэу Iоф ышIагъ, тематикэмкIэ редакцием ипрограммэ изэхэщакIоуи, ипащэуи щытыгъ. Илъэс 30 Iэпэ-цыпэр мы Iофым фигъэшъошагъ.
Санят ытхыхэрэр 1983-рэ илъэсым къыщыублагъэу хеутых. Иапэрэ усэхэр республикэ гъэзетэу «Адыгэ макъэм», журналэу «Зэкъошныгъэм» къыхаутыгъэх.
Итхылъхэри ахэм аужыIоу къызэкIэлъыкIуагъэх: иапэрэ усэ тхылъэу «Къеблагъ» (1992), «Уаипчъ» зыфиIорэ сборникыр, повестьхэр зыдэт тхылъэу «ШIэныгъэ шъэф» (2004). «ОшъогуитIум азыфагу» ышъхьэу романэссе, усэ тхылъхэу «ГущыIэр макIэу», «Гупшысэр жьыкорен» (2012) къыдигъэкIыгъэх.
Санят зэдзэкIын Iофми зыщиушэтыгъ, «Ушъый гъэсэпэтхыдэхэр» («Притчи Соломона») 2014-рэ илъэсым тхылъ шъхьафэу адыгабзэкIэ къыдигъэкIыгъ. Бзылъфыгъэ тхакIом джащ фэдэу иадыгабзэ егъэфедэ, хегъахъо ыкIи еухъумэ. Къэплъытэмэ, усэкIо-тхакIоу С. ГутIэр зытхэрэр илъэс 40 мыгъэ мэхъу.
Илъэс кIорэп иусакIэхэр, ирассказ ыкIи повесть пычыгъохэр журналэу «Зэкъошныгъэм» къыщыхимыутхэу, иповестэу «Хьэм ыцIагъэр Куплъ» зыфиIорэр журналым бэмышIэу къыдэхьагъ. Ар щыIэныгъэ лъэпсэ гъэшIэгъон зиIэ произведениеу, цIыфыр, ащ къешIэкIыгъэ чIыопсыри, нэмыкI псэ зыпытхэри нэм къыкIэзыгъэуцорэх, а зэкIэ нэрымылъэгъу IуданэкIэ зэрэзэпхыгъэхэр узыIэпищэу
С. ГутIэм къыриIотыкIыгъ. ЩыIэныгъэр пчъагъэу зэхэлъ, ар пшIэнымкIэ, къыбгурыIонымкIэ, о пшъхьэкIи ащ щыщ зыпшIынымкIэ мыщ фэдэ литературнэ произведениехэм мэхьанэшхо яI: еджэкIо цIыкIухэу ахэм яджэныр шэны зыфэхъугъэхэм ядунэееплъыкIэ псыхьагъэ мэхъу, яадыгабзэ къыхэхъо, яжабзэ хагъахъо, егъэчаны. Тхыгъэ литературэм, анахьэу кIэлэцIыкIухэм атегъэпсыхьагъэхэм, ахэр ащыщ мэхъух, пIуныгъэ-гъэсэныгъэмкIэ зишIуагъэ лъэшэу къакIорэх.
ГутIэ Санят зиIоф зыгъэшIухэрэм ащыщ, усэн-тхэныр ежь щыщ шъыпкъэ хъугъэу ыпэкIэ лъэкIуатэ. АР-м итхакIохэм я Союз илитературнэ IофышIэу мы аужырэ илъэсхэм мэлажьэ. Псауныгъэ пытэ иIэу, игухэлъышIухэр тапэкIи дахэу пхырищынхэу фэтэIо.
Мамырыкъо Нуриет.