Адыгеим испортсменэу Хьасанэкъо Алый дзю­домкIэ дунэе зэнэкъокъоу къалэу Измит (Тыркуем) щыкIуагъэм апэрэ чIыпIэр къыщыдихыгъ. ДзюдомкIэ олимпийскэ чемпионэу Хусейн Озкан ыцIэкIэ зэхащэгъэгъэ зэнэкъокъум хэгъэгу 16-мэ къарыкIыгъэ спортсменхэр хэлэжьагъэх. ДзюдомкIэ республикэ спорт еджапIэу Кобл Якъубэ ыцIэ зыхьырэр къэзыухыгъэ, тренерэу Хьакурынэ Дамир ыгъэсэрэ Алый килограмм 46-м нэс къэзыщэчыхэрэм ябэныгъ, IэпэIэсэныгъэшхо зэрэхэлъри тибатыр къыгъэлъэгъуагъ. Аферым!