Муниципальнэ образованиеу «Тэхъутэмыкъое районым» инароднэ депутатхэм я Совет ия 11-рэ сессие иIофшIэн Тэхъутэмыкъуае щы­ригъэжьэным ыпэкIэ районым испортсменхэм ащыщ­хэр агъэ­шIуагъэх. БэнэкIо ныбжьыкIэхэу урым-рим бэнэкIэ лъэп­къымкIэ 2023-рэ илъэсым гъэхъагъэхэр зышIыгъэхэм ящытхъу аIуагъ.

Тэхъутэмыкъое районым ипащэу Шъэо Аскэр Европэмрэ Урысыемрэ япервенствэ апэрэ чIыпIэр къыщызыхьыгъэу, Европэм ипервенствэ тыжьын медалыр къыщыдэзыхыгъэу Тимур Кошелевым, Европэм ипервенствэ джэрз, Урысыем ипервенствэ тыжьын ме­дальхэр къащызыхьыгъэу Нэхэе Рэмэзан, Урысыем ипервенствэ я 3-рэ чIыпIэр къызыщыфагъэшъошэгъэ Бар­цо Рэмэзан ягъэхъагъэхэмкIэ къафэгушIуагъ ыкIи щытхъу тхылъхэр аритыжьыгъэх.

Джащ фэдэу спортсменхэм дэгъоу зэрадэлажьэхэрэм фэшI тренерхэу НатIэкъо Шумафи, ЦIэIугъошIу Адами, Гедыоджэ Адами щытхъу тхылъхэр афагъэшъошагъэх.