Спорт гимнастикэмкIэ зэIухыгъэ зэнэкъокъу Новороссийскэ испорт еджапIэу «Надежда» зыфиIорэм щыкIуагъ. Спортсменки 100-м ехъу ащ хэлэжьагъ. АнахьыкIэхэм илъэси 8 аныбжьыгъ. Пшъэшъэжъыябэм ар яапэрэ зэнэкъокъоу щытыгъ. Мыекъуапэ испорт еджапIэу N 2-у В. С. Максимовым ыцIэ зыхьырэм зыщызыгъэсэрэ пшъэшъи 8-мэ яIэпэIэсэныгъэ зынэсырэр Новороссийскэ щаушэтыгъ. Краснодар краимрэ Ростов хэкумрэ къарыкIыгъэхэм тиспортсменкэхэр янэкъокъугъэх. Апэрэ чIыпIэу 2, ятIонэрэ чIыпIэу 2, ящэнэрэу 1 къахьыгъэх.

Я 2-рэ, я 3-рэ спорт разряд зиIэхэмкIэ апэрэ чIыпIэхэр къафагъэшъошагъэх Арина Кальченкэмрэ Ева Савочкинамрэ. Ахэм тIэкIу ауж къинэгъэ Диана Ивановамрэ Алиса Сотниковамрэ ятIонэрэ чIыпIэмкIэ тагъэгушIуагъ. София Грибановам я 3-рэ чIыпIэр зэнэкъо­къум щиубытыгъ. Спортсменкэхэр агъасэх апшъэрэ категорие зиIэ тренерхэу ХьакIмэфэ Светланэрэ Анна Перепелицэрэ.

БЗЭШIУ Асхьад.