Урысые культурэм и Мафэхэм къадыхэлъытагъэу Адыгэ Республикэм лъэпкъ къашъомкIэ и Къэралыгъо академическэ ансамблэу «Налмэсыр» IэкIыбым тикъэралыгъо къыщызыгъэлъагъохэрэм ахэтэу концертхэр къыщитыгъэх.

Бэдзэогъум и 9-м Таджикистан, и 12-м Вьетнам къэгъэлъэгъонхэр ащыкIуагъэх.

Купым ихудожественнэ пащэу ыкIи ибалетмейстер шъхьаIэу, Урысыем, Абхъазым, Пшызэ шъолъыр язаслуженнэ артистэу, Адыгеим инароднэ артистэу Хъоджэе Аслъан къызэрэтфиIотагъэмкIэ, пшъэрылъ шъхьаIэу агъэуцугъэр къадэхъугъ.

— Адыгэ къашъохэу «ЗэфакIор», «Зыгъэлъатэр», «Абхъаз къашъор», «ЛъэпэчIасэр», «Ислъамыер», «Къафэр», «Адыгэ уджхэр», нэмыкIхэри къэтшIыгъэх. Дахэу цIыфхэр къытпэгъокIыгъэх, тыгу ихъыкIырэр бэ. Джы пшъэрылъэу зыфэд­гъэуцужьырэр программакIэу «Адыгэ нысэщэ джэгу» зыфиIорэм изэхэгъэуцон, Урысыем культурэмкIэ и Министерствэ игрантэу къыдэтхыгъэмкIэ ар дгъэхьазырыщт.

Таджикистан икъалэу Ху­джандэ «Налмэсым» иконцерт щыкIуагъ. Ащ еплъыгъэ согдийскэ цIыф купым Iэгушъо фабэр зэпымыоу къапигъохыгъ. Ижъы­рэ къашъохэм ядэхагъэ лъэшэу агу рихьыгъ. КъашъохэмкIэ лъэпкъым икультурэ къыкIугъэ гъогур къагъэлъэгъуагъ.

Урысыем икультурэ и Мафэу Вьетнам щыкIуагъэм хэлэжьагъэр «Налмэсым» исолистэу, Адыгеим изаслуженнэ артистэу Хьажэкъо Пщымаф. Ащ икъэгъэлъэгъонэу «Къамэхэр зыкIыгъу къашъор» зыфиIорэр Вьетнам икъокIыпIэ щыпсэухэрэм аригъэлъэгъугъ. Къашъор Мамыекъо Интихьам ыгъэуцугъ. Къамэр адыгэхэмкIэ апэрэ Iашэу, иунагъуи илъэпкъи янамыс хъулъфыгъэм къыгъэгъунэнхэу зэрэфэхьазырым итамы­гъэу щыт. Джырэ лъэхъаным къамэр Iашэу агъэфедэжьырэп, ау адыгэм лIэшIэгъубэм къапкъырихыгъэу непэрэ мафэхэми фэIазэу егъэIорышIэ.

Къашъохэм анэмыкIэу сурэт къэгъэлъэгъон дахэу агъэхьазырыгъэм къыхиубытэу цIыфхэр нэIуасэ афашIыгъэх Урысыем щыпсэурэ лъэпкъхэм якультурэ идэхагъэ. Бэдзэогъум и 12-м Вьетнам икъалэу Халонг программэр щызэфашIыжьыгъ.

Лъэпшъыкъо Фатим.