Адыгеим и ЛIышъхьэу КъумпIыл Мурат концерт къэтыпIэу «Налмэсым» игъэцэкIэжьын зэрэкIорэр ыуплъэкIугъ. Лъэпкъ проектэу «Культурэм» диштэу культурэмкIэ учреждениехэр зэрагъэкIэжьхэрэм къыдыхэлъытагъэу 2023-рэ илъэсым игъатхэ гъэцэкIэжьын IофшIэнхэр мыщ щырагъэжьагъэх.

ЛIышъхьэм игъусагъэх АР-м иминистрэхэм я Кабинет и Тхьаматэу КIэрэщэ Анзаур, АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Къонэ Заур, АР-м культурэмкIэ иминистрэ иапэрэ гуадзэу Ольга Гавшинар.

Мыекъопэ мебелышI фабрикэу «Зэ­къошныгъэм» культурэмкIэ и Унэу 1953-рэ илъэсым фагъэпсыгъагъэу тарихъ мэхьанэ зиIэм иархитектурэ гъэ­псыкIэ къызэтегъэнэжьыгъэн зэрэфаер Адыгеим и ЛIышъхьэ къыхигъэщыгъ. Классическэ шапхъэм диштэу гъэпсыгъэ, кIэсэн лъагэхэр зиIэ унэр архитектурэ саугъэ­тэу щыт ыкIи къалэм итеплъэ зыгъэ­дахэхэрэм ащыщ.

«Илъэс 70-рэ хъугъэу творческэ Iофышхо мыщ щызэIуахы. Лъэпкъ къашъомкIэ Къэралыгъо академическэ ансамблэу «Налмэсымрэ» Камернэ музыкальнэ театрэмрэ языкъэгъэлъэгъопIэ шъхьаIэу щыт концерт залым шIоу хэлъхэр къызэтегъэнэжьыгъэнхэ ыкIи шэпхъакIэхэм адиштэу зэтегъэпсыхьэгъэн фае. Творческэ купхэм зыкъызыщагъэ­лъэгъорэ, культурэ Iофтхьэбзэ зэфэшъхьафхэр зыщызэхащэрэ концерт залым гъэцэкIэжьын дэгъу ешIылIэгъэн, мы псэуалъэм истатус диштэрэ теплъэ дахэ егъэгъотыгъэн, джырэ шапхъэхэм адиштэрэ концерт зал гъэпсыгъэн фае», — къыIуагъ КъумпIыл Мурат.

Адыгеим культурэмкIэ и Министерствэ къызэритыгъэмкIэ, концерт залым гъэцэкIэжьынышхохэр рашIылIэщтых, унашъхьэр, инженер коммуникациехэр, кондиционерхэр, вентиляторхэр зэблахъу­щтых, ыкIыбкIи ыкIоцIыкIи ар агъэдэхэщт. Зал шъхьаIэмрэ камернэ залымрэ яоборудовании ямебели зэблахъущтых. Концерт залым игъэкIэжьын сомэ миллион 660-рэ пэIухьащт. 2024-рэ илъэсым ыкIэм нэс IофшIэнхэр аухынхэу рахъухьэ.

IофшIэнхэр игъом агъэцэкIэнхэм гъунэ лъафынэу, унэр зэрагъэцэкIэжьырэм дакIоу ащ къыпэIулъ чIыпIэм изэтегъэ­псыхьани Iоф дашIэнэу КъумпIыл Мурат пшъэрылъ афишIыгъ. Культурэ Iофтхьабзэхэр нахьыбэу республикэм щызэхэщэгъэнхэмкIэ, творчествэмрэ гъэсэныгъэмрэ зыщягъэушъомбгъугъэнымкIэ нэмыкI пшъэрылъхэри ЛIышъхьэм афи­шIыгъэх.

«Культурэм зыкъегъэIэтыгъэнымкIэ, профессиональнэ купхэми, творческэ самодеятельностым пылъхэми ящыкIэгъэ амалхэр ягъэгъотыгъэнхэмкIэ Iофышхо зэшIотэхы. ТшIэрэр зэкIэ цIыфхэм къафэфедэным, культурэ чIыпIэхэм Iофтхьэбзэ гъэшIэгъонхэр ащызэхащэнхэм мэхьанэшхо яI», — къы­Iуагъ Адыгеим и ЛIышъхьэ.

Шъугу къэтэгъэкIыжьы 2017-рэ илъэ­сым къыщегъэжьагъэу культурэм и Уни 9 республикэм зэрэщагъэпсыгъэр, Унэ 45-мэ гъэцэкIэжьын IофшIэнхэр зэрарашIылIагъэр. Мы аужырэ илъэси 5-м модельнэ тхылъеджэпIэ 12 агъэпсыгъ, искусствэхэмкIэ кIэлэцIыкIу еджэпIи 10 агъэкIэжьыгъ. АР-м лъэпкъ культурэмкIэ и Гупчэ, АР-м исурэт къэгъэлъэгъуапIэ, Пушкиным ыцIэкIэ щыт унэр, АР-м и Лъэпкъ музей агъэцэкIэжьыгъэх. Мыгъи культурэм и Уни 3-мэ гъэцэкIэжьын IофшIэнхэр арашIылIэх, Уни 2 агъэпсы. Культурэм исквер Мыекъуапэ къыдэтэджагъ, АР-м и Къэралыгъо филармониерэ концерт залэу «Налмэсымрэ» джы агъэкIэжьых.

АР-м и ЛIышъхьэ ипресс-къулыкъу