Дзэ операцие хэушъхьафыкIыгъэу Украинэм щыкIорэм икъулыкъу пшъэ­рылъ ыгъэцакIэзэ, генерал-лейтенантэу Цоков Олег Юрий ыкъор щыфэхыгъ. Олег Юрий ыкъор 1971-рэ илъэсым Iоныгъом и 23-м къэхъугъ. Ташкент дэтыгъэ апшъэрэ дзэ команднэ училищыр 1994-рэ илъэсым, М. В. Фрунзе ыцIэкIэ щыт дзэ Академиер 2000-рэ илъэсым къыухыгъэх.

Училищым ыуж Сыбыр дзэ округым къулыкъу щихьыгъ, взводыми, ротэми япэщагъ. Чэчэн Республикэм щыкIогъэ заохэм ахэлэжьагъ. 2000-рэ илъэсым къыщегъэжьагъэу 2004-рэ илъэсым нэс я 74-рэ мотошхончэо бригадэм ия 2-рэ мотошхончэо батальон икомандирэу ятIонэрэ чэчэн заом хэлэжьагъ.

2011-рэ илъэсым къыщегъэжьагъэу 2014-рэ илъэсым нэс Къыблэ дзэ округым ия 49-рэ дзэ ия 33-рэ мотошхончэо бригадэ икомандир игуадзэу Мыекъуапэ къулыкъу щихьыгъ.

ЫужкIэ Цоков Олег Юрий ыкъом Урысые Федерацием м УIэшыгъэ КIуа­чIэхэм пэщэ IэнэтIэ зэфэшъхьафхэр ащиIыгъыгъэх, Къыблэ дзэ округым ия 49-рэ дзэ ипащэ игодзагъ, Сирием щыкIогъэ заохэм ахэлэжьагъ, Урысые Федерацием и УIэшыгъэ КIуачIэхэм я Генеральнэ штаб идзэ Академие ще­джагъ.

Апэрэ мафэхэм къащегъэжьагъэу Украинэм щыкIорэ хэушъхьафыкIыгъэ дзэ операцием хэлэжьагъ, дзэм ипащэу агъэнэфэгъагъ. 2022-рэ илъэсым иIоныгъо Луганскэ Народнэ Республикэм Сватовскэ лъэныкъомкIэ хьылъэу къы­щауIэгъагъ, 2023-рэ илъэсым имэзае Урысые Федерацием и Президент и УказкIэ генерал-лейтенантыцIэр къыфа­гъэшъошагъ.

Къыблэ дзэ округым ипащэ игуадзэу Цоков Олег 2023-рэ илъэсым бэдзэогъум и 11-м фэхыгъ.

Хэгъэгум узэрэфэлэжьэн, къулыкъу хабзэхэм узэрафэшъыпкъэн фаемкIэ, цIыфыгъэ напэм икъэухъумэнкIэ генерал-лейтенантэу Цоковыр щысэтехыпIэу щытыгъ.

Сыд фэдэрэ IэнатIэ зегъэцакIи, пшъэрылъэу пащэхэм къыфашIыхэрэр зэкIэ ащ гъэхъагъэ хэлъэу ыгъэцакIэщтыгъэх. О. Ю. Цоковым Жуковым иорден, ЛIыхъужъныгъэм иорденищ, орденэу «За военные заслуги» зыфи­Iохэрэр ыкIи нэмыкI медальхэр къызэрэфагъэшъошагъэхэм къаушыхьаты Хэгъэгум ыпашъхьэ ащ гъэхъэгъэшхохэр зэ­рэщыриIэр.

Генерал-лейтенантэу Цоков Олег Юрий ыкъор ренэу шIукIэ тыгу илъыщт, дзэ къулыкъумрэ Хэгъэгумрэ ар зэрафэшъып­къагъэмкIэ урысые дзэкIолIхэм ренэу щысэтехыпIэу яIэщт. Лъэшэу гухэкI тщыхъоу фэхыгъэм иунагъорэ иIахьылхэмрэ тафэтхьаусыхэ, якъин адэтэгощы.

М. Къ. КъумпIыл, В. И. Нарожный, С. Л. Дрокин, Б. А. Шумэн, А. А. КIэращ, М. Къ. Хъопсэрыкъу, А. В. Наролин, В. М. Резник, М. Р. Хьасанэкъу, В. П. Свеженец, А. В. Аверин, М. А. Марьин, Г. А. Митрофанов, А. А. Къуаджэ, Ю. Ф. Щепин, А. А. Дорофеев, Ю. Н. Калягин, Н. М. Гъу­кIэлI