Медаль 11 къафагъэшъошагъ
Джиу-джитсу зыфаIорэ бэнакIэмкIэ дунэе зэнэкъокъоу Ростов-на-Дону щыкIуагъэм Адыгеим испортсменхэм медаль 11 къыщыдахыгъ. Тиреспубликэ ыцIэкIэ Евразием ичемпионат хэлэжьагъэр Мыекъуапэ грэпплингымкIэ иакадемие икупэу тренерэу Ламыкъо Асхьад ыгъасэрэр ары.
Хэгъэгу зэфэшъхьафхэм къарыкIыгъэ спортсменхэр яIэпэIэсэныгъэкIэ мыщ пхъашэу щызэнэкъокъугъэх. Урысыем нэмыкIэу, Белоруссиеми, Армениеми, Узбекистани, Таджикистани, Киргизиеми ябэнакIохэр яшъыпкъэу ащ хэлэжьагъэх. Мыекъуапэ испортсменхэр кимоно зыщыгъыгъэ ыкIи зыщымыгъыгъэ купитIумэ ахэтхэу бэнэнымкIэ яIэпэIэсэныгъэ зынэсырэр къагъэлъэгъуагъ.
Кимоно зыщыгъыгъэхэмкIэ Мыекъуапэ икIыгъэхэу Мирза Муртазалиевыр, Нажьэ Налбый, Чэужъ Аскэр, Хьаткъо Байзэт зэнэкъокъум ичемпион хъугъэх. Кимоно зыщымыгъыгъэхэмкIэ Нажьэ Налбыйрэ Ацамаз Маргиевымрэ текIоныгъэр къыдахыгъ. Мыекъуапэ грэпплингымкIэ иакадемие икуп джащ фэдэу тыжьын медалиплIи, зы джэрз медали къылэжьыгъэх. ТибэнакIохэм зэнэкъокъум икоманднэ зачет апэрэ чIыпIэр къыщыдахын алъэкIыгъ.