ДзюдомкIэ Урысые зэнэкъокъу
ДзюдомкIэ я X-рэ Урысые зэнэкъокъоу СССР-м изаслуженнэ тренерэу, АКъУ-м физическэ культурэмкIэ ыкIи спортымкIэ и Институт иапэрэ ректорэу Кобл Якъубэ ишIэжь фэгъэхьыгъэр бэдзэогъум и 22-м Адыгэ къэралыгъо университетым спортымкIэ и Унэшхоу Кобл Якъубэ ыцIэ зыхьырэм щыкIощт.
Урысыем ишъолъыр 25-мэ яспортсменхэм ащ хэлэжьэнхэу пэшIорыгъэшъэу зарагъэтхыгъ. Адыгеим ибэнакIохэми яIахьышIу ащ хашIыхьащт. Зэнэкъокъур сыхьатыр 10-м рагъэжьэщт. Пчыхьэм сыхьатыр 4-м мэфэкI шIыкIэм тетэу ар къызэIуахыщт. Кобл Якъубэ ыгъэсэгъэ бэнэкIо цIэрыIохэри ащ къырагъэблэгъэщтых.
ЗэхэщакIохэр АР-м дзюдомкIэ ифедерацие, дзюдомкIэ Олимпиадэхэм ахэлэжьэщтхэр зыщагъэхьазырырэ спорт еджапIэу Я. Къ. Коблым ыцIэ зыхьырэр, Адыгэ къэралыгъо университетыр ары.
Тренер цIэрыIоу, самбэмкIэ ыкIи дзюдомкIэ Мыекъопэ еджапIэр, апшъэрэ спорт IэпэIэсэныгъэ зыщарагъэгъотырэ Мыекъопэ еджапIэр, АКъУ-м физическэ культурэмкIэ ыкIи дзюдомкIэ иинститут зэхэзыщэгъэ Кобл Якъубэ СССР-мрэ Урысыемрэ спортымкIэ язаслуженнэ мастер 11, СССР-мрэ Урысыемрэ спортымкIэ ямастер 300-м ехъу къыгъэхьазырыгъ.
АКъУ-м ипресс-къулыкъу.