КIэлэцIыкIу лагерэу «Лань» зыфиIорэм «Спортым итхьамаф» зыцIэ Iофтхьабзэр щыкIуагъ.

Херсон хэкум къикIыгъэ кIэлэцIыкIухэри физкультурэ Iоф­тхьабзэхэм ахэлэжьагъэх. Мые­къопэ районым иадминистрациерэ Адыгэ Республикэм физическэ культурэмкIэ ыкIи спортымкIэ и Комитетрэ кIэщакIо зэрэ­фэхъугъэхэм тетэу атлетикэ псын­кIэмкIэ, гандболымкIэ, баскетболымкIэ, скейтбордингымкIэ зэнэкъокъоу зэхащагъэхэм кIэлэцIыкIухэмрэ пшъэшъэжъыехэмрэ якъулайныгъэ къащагъэлъэгъуагъ. Iофтхьабзэм икIэух текIоныгъэ къыдэзыхыгъэхэм шIухьафтынхэр афагъэшъошагъэх.

Херсон хэкум къикIыгъэ кIэлэцIыкIухэр шы спортымкIэ рес­публикэ еджапIэмрэ щэрыонымкIэ спорт еджапIэу С. Г. Алифиренкэм ыцIэ зыхьырэмрэ аща­гъэх. Спорт еджапIэхэм япащэхэм шыхэм, щэрыоным афэгъэхьы­гъэу кIэлэцIыкIухэм бэу къафаIотагъ, шыхэм атесхэу къыращэкIыгъэх.