Бэдзэогъум и 7-м къы­щыублагъэу и 16-м нэс къалэу Москва щэ­кIо ятIонэрэ фести­валэу «Вкусы России» зыфиIорэр.

Урысыем мэкъу-мэщымкIэ и Министерствэ ар зэхищагъ. Гу­хэлъ шъхьаIэу фестивалым иIэр шъолъырхэр нахь цIэрыIо зы­шIыхэрэ, цIыф жъугъэхэм агу рихьыгъэ шхыныгъохэр зэлъя­гъэшIэгъэнхэр ары.

Мы Iофтхьабзэр хэгъэгум икъэлэ шъхьаIэ и Манежнэ гупчэ щэкIо. Ти Урысые икъогъупэ зэ­фэшъхьафхэм къаращыгъэ анахь шхыныгъо IэшIухэр ермэлыкъым къырахьылIагъэх.

Хабзэ зэрэхъугъэу мы фестивалым хэлажьэх Адыгеим илIыкIохэри. Республикэр нахь зэ­лъязыгъэшIэгъэ шхыныгъохэр ащ къырахьылIагъэх. Фестивалым ихьакIэхэм фермер зэфэшъхьафхэм якъуаехэр, мыщ хэхьэ адыгэ къуаер, шъоур, адыгэ бжьы­ныфщыгъур, хэубэ зэфэ­шъхьафхэр ыкIи лым хэшIыкIыгъэ шхыныгъохэр ауплъэкIунхэ алъэкIыщт.

Фестивалым икультурнэ программэ къыгъэкIэрэкIэщт Шэу­джэн районым иорэдыIо ансамблэу «Джэныкъом». Ащ фэгъэ­хьыгъэу къытыгъ Адыгэ Респуб­ликэм мэкъу-мэщымкIэ и Ми­нистерствэ.