Урысыем ипервенствэу илъэс 18 — 20 зыныбжь спортсменхэр зыхэлэжьагъэхэр Екатеринбург щыкIуагъ.

Адыгеим испортсменхэу атлетикэ псынкIэм пылъхэм дышъэ медали 2-рэ зы тыжьын медальрэ ащ къыщахьыгъ. Олимпиадэхэм ахэлэжьэщтхэр зыщагъэхьазы­рырэ спорт еджапIэу N 1-м ­испортсмени 5 Адыгеим ыцIэкIэ мы зэнэкъокъум хэлэжьагъ.

Владислав Подзвездовым ды­шъэ медали 2, Александр Урицкэм тыжьын медаль мы зэнэ­къокъум къыщахьыгъ. Подзвездовыр спорт лъэпкъитIумкIи — метрэ 800-мрэ ыкIи метрэ 1500-мрэ якъэчъынкIэ атекIуагъ. Такъикърэ нэгъэупIэпIэгъу 48-кIэ ащ метрэ 800-р, такъикъи 3-рэ нэгъэупIэпIэгъу 44-кIэ метрэ 1500-р ащ къычъыгъэх.

— Зэнэкъокъум ыпэкIэ тренерыр къысэлъэIугъагъ къызыхъугъэ мафэмкIэ шIухьафтын фэсшIынэу — къэчъэным сыщатекIонэу. Ащ илъэIу фэзгъэцакIэзэ, кIуачIэу сиIэр есхьылIи, слъакъуи, сIи зэрэфыкъогъагъэхэм емылъытыгъэу зэрэсфэлъэкIэу сыкъэчъагъ, — къытфиIотагъ Владислав.

Александр Урицкэми тренерыр ыгъэгушIуагъ. Пэрыохъухэр зэпичызэ, метрэ 3000-р ащ псынкIэу къычъыгъ. Чувашскэ Республикэм къикIыгъэ Александр Алексеевым мы лъэныкъом апэрэ чIыпIэр щиубытыгъ. Александр Урицкэм такъикъи 9-рэ нэгъэупIэпIэгъуи 9-рэ ащ тыригъэкIодагъ ыкIи я 2-рэ чIыпIэр къыдихыгъ. Спорт­сменитIури зыгъасэрэр Евгений Ха­бибулиныр ары. Адыгэ Респуб­ликэми, Краснодар краими ацIэкIэ ахэр мы зэнэкъокъум хэлэжьагъэх.

Даниил Субботиным я 4-рэ, Роберт Раджабовым — я 16-рэ, Екатерина Анохинам — я 16-рэ чIыпIэхэр къахьыгъэх. Очко 91-рэ изыгъэкъугъэ Адыгеир я 2-рэ лигэм хэт. Урысыем ишъолъыр 19 зыхэхьэрэ лигэм республикэ апэрэ чIыпIэр щиIыгъ.