Лирик иныгъ
Мы дунэешхоу къытэшIэкIыгъэм ишъэбэгъэ-дэхагъэ, иIэшIугъэ- гъэшIэгъоныгъэ кIигъэтхъэу щэIэфэ усагъэ Бэрэтэрэ Хьамидэ, игупшысэ налъэхэр емызэщыжьэу, IудэнэкIэ псыгъоу мэстанэм риунхэр фэукIочIыгъ, адыгэ литературэр игучIэ мэкъэ зафэкIэ ыгъэбаигъ, бэу къымыгъэшIагъэми, шIагъэу иIэр макIэп, усэкIо-лирикыгъ.
Бэрэтэрэ Хьамидэ Теуцожь районым итыгъэ къуаджэу Къэзэныкъуае бэдзэогъум и 9-м, 1931-рэ илъэсым къыщыхъугъ. Гурыт еджапIэр тыжьын медалькIэ къыухыгъ. Зы илъэсрэ кIэлэегъаджэу Iоф ышIагъэу Москва дэт университетэу М. В. Ломоносовым ыцIэ зыхьырэм чIахьи, журналистикэмкIэ ифакультет 1958-рэ илъэсым къыухыгъ. Ащ пыдзагъэу илъэситIурэ театральнэ искусствэмкIэ Къэралыгъо институтэу А. Луначарскэм ыцIэкIэ щытым Адыгэ студиеу къыщызэIуахыгъагъэм щыригъэджагъэх. Ащ ыужырэ илъэсхэм хэку гъэзетхэу «Социалистическэ Адыгем», «Адыгейская правда», край гъэзетэу «Советская Кубань» зыфиIохэрэм, Краснодар краим итхакIохэм яорганизацие Iоф ащишIагъ, ащ дакIоу, МГУ-м журналистикэмкIэ иаспирантурэ къыухыгъ, 1969-рэ илъэсым тарихъ шIэныгъэхэмкIэ кандидат хъугъэ. Ащ щегъэжьагъэу Пшызэ мэкъумэщ институтым IэкIыб хэгъэгу къикIыгъэ студентхэр зыщеджэрэ факультетым общественнэ шIэныгъэхэмкIэ икафедрэ икIэлэегъэджэ шъхьаIэу, идоцентэу, ипащэу 1985-рэ илъэсым нэс Iоф ышIагъ. 1985-рэ илъэсым къыщегъэжьагъэу Адыгэ къэралыгъо университетым хэгъэгу тарихъымкIэ икафедрэ идоцентэу, нэужым ипрофессорэу опсауфэ лэжьагъэ.
1950-рэ илъэсым къыщыублагъэу ытхыхэрэр хиутыщтыгъэх. ЩыIэныгъэм нэшIукIэ хэплъэрэ тхэкIуагъ. Адыгабзэр ыгъэжъынчэу ыкIи икIасэу усэщтыгъэ, поэтическэ тхылъ 17 адыгабзэкIэ, драматургие произведениехэр дэтхэу «Пьесэхэр» ыкIи иусэхэмрэ ипоэмэхэмрэ зыдэхьэгъэ тхылъи 7 урысыбзэкIи къыдэкIыгъэх.
Игупсэ Адыгеим идэхагъэ, адыгэхэм яшэн-хэбзэшIухэр, чIыопсым охътэ-лъэхъэнэ дэй гори имыIэу, ахэр хъырахъишъэу, дахэу зэрэзэкIэлъыкIохэрэр итхылъхэу «Нэфылъ», «Гъэтхэпэ псалъ», «Тыгъэнэбзый», «ПсынэкIэчъ мычъэкъожь», «Бжыхьэ пкIашъ», мыхэм анэмыкIхэми ащыкIигъэтхъыгъ. А зэкIэ ыгу нэсыпэу, анахь гущыIэ фабэхэр ыкIи ахэмкIэ шъо теплъэ зэфэшъхьафхэр — эпитетхэр емызэщыжьэу къыгъотыщтыгъ Хьамидэ, зэчый дахэу хэлъыр джаущтэу къыхэкIыжьыщтыгъ. Илирикэ зэрэщытэу, сурэтшIыгъэ къэгъэлъэгъон кIэракIэм фэд:
…Тыгъэнэбзыйхэр сIэгу зэризхэр! Хэт къысиIона, сыд къысщышIыгъ? ШIу усэлъэгъу! Джары сиузыр, Гъатхэм шIулъэгъоу укъысфихьыгъ.
ЩыIэныгъэм игупсэф-рэхьат ыгъэнасыпышIоу, зэпыуи зэпычи имыIэу тхэщтыгъ усакIор, творческэ кIэн лъапIи зэIуигъэкIагъ. ЛэжьэкIо цIыфым ыIэ мыпшъыжьхэу чIыгум хэлъхэр лIыгъэ-псэемыблэжьныгъэр, мэфакIэ пэпчъ гушIуагъоу хэлъыр, цIыкIуи ини агу зыIэтэу, апэкIэ лъызыгъэкIуатэу зэрэщытыр усакIом емызэщыжьэу къыриIотыкIыгъ. Iофыр щыIэныгъэм ылъапсэу, цIыфыр зыузэнкIырэ амалышхоу зэрэщытыр, ежь фэдэ цIыфыр ыгъэлъэпIэныр, цIыф лъэпкъхэр зэгурыIонхэр мамырныгъэм зэрилъапсэр ыгъэунэфэу усагъэ Бэрэтэрэ Хьамидэ.
Нэпкъ-пэпкъ дахэ зэриIагъэм диштэу, усакIор шIыкIэшIуагъ. Джыри сынэгу кIэт я 90-рэ илъэсхэм Мыекъуапэ игупчэу В. И. Лениным ыцIэ зыхьырэм, гъэмэфэ пчыхьапэхэр ащкIэ агъэкIэракIэхэу, жъи кIи дахэу къыщызэхахьэхэти, адыгэ джэгушхохэр зэрэщашIыщтыгъэхэр. ХьатиякIор нэчанба, хэшыпыкIыгъэ хъулъфыгъэ купымкIэ рекIокIи, «Уай, уай адыгэ усакIоу Бэрэтэрэ Хьамид! Хъярым къекIолIагъэхэм «плъэгу тыкIэгъаплъ» аIо» ыIозэ, Хьамидэ пчэгум къырищагъ, ежьыри зэкIэкIожьыгъэп, «Анахь пшъэшъэ къэшъуакIор къытерэхь!» ыIуагъ, бзыу тамэу, пшъэшъэ ныбжьыкIэ дахэр пчэгум къилъэрэзагъ, тIури, зызэдагъэсагъэм фэдэу, дахэу къэшъуагъэх.
УсакIор зышIэщтыгъэхэм къызэраIощтыгъэмкIэ, шэнышIо- гушIубзыоу, хэти фэзафэу, иунагъуи, ишъхьэгъуси зыпишIынхэ щымыIэу щыIагъ. Адыгэ къашъохэм ядэхэгъэ-гъэшIэгъоныгъэ ХьамидэкIэ лъэпIагъэ, арэу къычIэкIын иапэрэ усэ тхылъэу урысыбзэкIэ къыдэкIыгъэм «Исламей» цIэу зыкIыфишIыгъэр, джащ фэд, икIэсэ къушъхьэ лъагъохэри, иныбджэгъухэри Бэрэтарым игупшысэ къезыгъэблыхэу, итворческэ кIуачIэ къэзыIэтыгъэх. «Тропинка в горы», «Яблоня деда», нэмыкIхэри цIыфымкIэ уасэ зиIэхэу, ыпэкIэ зыгъаплъэхэу, имурад ехьыжьагъэ фэзыгъэчэфхэу, ипоэтическэ жьыкъащэ ыкIи игутео зыгъэлъэшхэрэм зэращыщхэр къыушыхьатыгъ.
Бэрэтэрэ Хьамидэ ыгукIэ орэдыр, къашъор лъэшэу зэрикIэсагъэхэр, илэгъу-иныбджэгъухэм, игупсэхэм дэгъоу ашIэщтыгъ ыкIи къаIощтыгъ. Ар зэрэшъыпкъэр зэхэошIэ Хьамидэ илирикэ уеджэ зыхъукIэ, ар къыодэхашIэ, къыпфэсакъы, къыбдеIэ. Илъэс 64-рэ ныIэп къыгъэшIагъэр усакIом, ау ар иусэ-гупшысэ хъырахъишъэхэмкIэ зэлъыпкIагъ. Хьамидэ адыгэ литературэм апэрэу сонетыр къыхилъхьагъ, усэкIэ гъэшIэгъон лъэшри ыIэ къыригъэхьаныр фызэшIокIыгъ.
Бэрэтарым иусэхэм ащыщхэр адыгэ композиторхэм орэдышъохэм аралъхьагъэх, ахэр тиартистхэм агъэжъынчых.
УсакIор литературэм фытегъэпсыхьэгъагъ, ежь усэхэр зэритхырэм имызакъоу, Анхел Гимер ипьесэу «Человек и волк», А. Островскэм итхыгъэхэу «Не было ни гроша да вдруг алтын», «Не все коту масленица» зыфиIохэрэр адыгабзэкIэ зэридзэкIыгъэх, ахэр Адыгэ драмтеатрэм ыгъэуцугъэх. Охътэ зэфэшъхьафхэм адыгабзэм рилъхьэхи къыхиутыгъэх Коста Хетагуровым, Корней Чуковскэм, КIышъэкъо Алим, С. Хохловым яусэхэр. Джащ фэдэу Шота Руставели ипоэмэ цIэрыIоу «Витязь в тигровой шкуре» зыфиIорэр адыгабзэкIэ зэридзэкIи 1989-рэ илъэсым къыдигъэкIыгъ.
Бэрэтэрэ Хьамидэ АР-м инароднэ усакIу, УФ-м культурэмкIэ изаслуженнэ IофышI, Урысыем итхакIохэм я Союз 1962-рэ илъэсым къыщегъэжьагъэу хэтыгъ, Адыгеим къэралыгъо премиехэр афэгъэшъошэгъэнхэмкIэ щызэхэщэгъэ икомиссие итхьамэтагъ. ЫшIэрэ Iофым ыгуи ыпси хилъхьэщтыгъ.
Мамырыкъо Нуриет.