Урысыем иныбжьыкIэхэу дзэ къулы­къур зыхьынэу зипIалъэ къэсыхэрэм я Спартакиадэ Волгоград щэкIо.

Бэдзэогъум и 11-м нэс щыIэщт Iофтхьабзэр зыфэгъэхьыгъэр нэмыцыдзэхэр Сталинград дэжь зыщызэхакъутагъэхэр илъэс 80 зэрэхъурэр ары. Федеральнэ проектэу «Спортыр — щыIэныгъэ шапхъ» зыфиIорэм диштэу мыщ фэдэ зэнэкъокъур зэхащэ. Адыгеим ыцIэкIэ гурыт еджапIэу N 25-м икIэлэеджэкIуи 10-рэ Инэм икIэлэегъэджи 2-рэ ащ хэлажьэх.

Илъэс 14 — 17 зыныбжь кIалэхэмрэ пшъашъэхэмрэ тхьамафэм ехъурэ спорт, дзэ дисциплинэ 11-мкIэ яIэпэIэсэныгъэ зынэсырэр къагъэлъэгъощт. Дзэ къулыкъум зэрэфэхьазырхэмкIэ, автоматым изэхэхынкIэ ыкIи иугъоижьынкIэ, пневматическэ винтовкэкIэ щэрыонхэмкIэ, есынымкIэ, спорт снарядым идзынкIэ, метрэ 60-мрэ километри 3-мрэ якъэчъынкIэ, къэлъэнымкIэ ахэр зэнэкъо­къущтых. Урысыем ишъолъыр 52-мэ къарыкIыгъэ спортсменхэр ащ хэлажьэх.