Пцэжъыяшэм и Мафэ къэблагъэ. Хабзэ зэрэхъугъэу, бэдзэ­огъум иятIонэрэ тхьаумафэ ар илъэс къэс хагъэунэфыкIы. Мыгъэ ар зытефэрэр бэдзэогъум и 9-р ары.

Пцэжъыеешэныр зикIасэхэу Адыгеим исыр бэ. Профессиональ­нэ пцэжъыяшэхэу урысые зэнэкъо­къухэм ахэлажьэхэрэри тиIэх.

Краснодар краимкIэ станицэу Каневскоим ипсыIыгъыпIэ карпым икъыхэдзынкIэ Урысыем и Кубок къыдэхыгъэнымкIэ я 3-рэ кIэух зэнэкъокъу бэмышIэу щыкIуагъ. Адыгеим испортсмен купи 6 ащ хэлэжьагъ. ПстэумкIи хэгъэгум ишъолъыр зэфэшъхьафхэм якуп 45-рэ Урысыем и Кубок икъыдэ­хын фэбэнагъ. Урысыем ипцэжъы­яшэхэм яIэпэIэсэныгъэ зэрэ­хэхъуагъэр мы зэнэкъокъум къы­щылъэгъуагъ.

Апэрэ едзыгъом къыщегъэжьагъэу пцэжъыяшэхэм язэнэкъокъу къызэкIэблагъ. Баллхэу къахьыгъэхэр зэхалъытэжьхэзэ, едзыгъуищмэ якIэуххэр агъэнэфагъэх. Адыгеим икIыгъэ пцэжъыяшэхэу, спортымкIэ мастерэу Руслан Брызгуновымрэ мастерынымкIэ кандидатэу Сергей Ткаченкэмрэ я 6-рэ чIыпIэр къахьыгъ.

Зэнэкъокъум анахь дэгъоу зыкъыщызгъэлъэгъогъэ купи 10-мэ Адыгеим ипцэжъыяшэхэу, спортымкIэ мастерхэу Сергей ыкIи Алексей Артюхинхэри ахэфагъэх. АтекIуагъэхэр Ставрополь, Хабаровскэ крайхэм, Ненецкэ автоном коим къарыкIыгъэ пцэжъыяшэхэр ары.

Пцэжъыяшэм и Мафэ шъуиныбджэгъухэмрэ къышъупэбла­гъэхэмрэ шъуаIукIэнхэмкIэ, чIы­опсым идэхагъэ джыри зэ зэ­жъугъэлъэгъунымкIэ амалышIоу щыт. Ау шъукъэзыуцухьэрэ дунаим зэрар ешъухы, ар шъуушIои зэрэмыхъущтыр зыщышъумыгъэгъупш. Пцэжъыяшэм и МафэкIэ тышъуфэгушIо.