Мыекъуапэ щыщ спортсменкэу, Урысыем спортымкIэ имастерэу Елена Ермолинам Беларусь щыкIогъэ зэнэкъокъум тыжьын ме­даль къыщихьыгъ.

Тихэгъэгу къэзыгъэлъэгъогъэ урысые спортсмен 22-мэ ар ащыщыгъ. Брест истадион мэфи 2 Урысыемрэ Беларусьрэ яспорт­сменкэхэр щызэнэкъокъугъэх. Атлетикэ псынкIэмкIэ тренерэу, Олимпиадэхэм ахэлэжьэщтхэр зыщагъэхьазырырэ республикэ спорт еджапIэм ипащэу Сергей Сухановым ыгъэсэрэ Еленэ семиборьемкIэ очко 5788-рэ ригъэ­къугъ. Беларусь щыщ Шарлота Паэглите ары дышъэ медалыр къыдэзыхыгъэр, ащ очко 6018-рэ ригъэкъугъ. Урысыем испорт­сменкэу Вероника Тычинкинам я 5-рэ чIыпIэр къыдихыгъ, очко 4954-рэ къылэжьыгъ.