Урысыем иблогерхэр тур гъэшIэгъонэу «Культурэм ишъо­лъыр — Адыгеир» зыфиIорэ проектым хэлэжьэнхэу Адыгэ Республикэм къэкIуагъэх. [caption id="attachment_135434" align="aligncenter" width="800"] А. Лаутеншлегер.[/caption]

Бэдзэогъум и 4-м щегъэжьагъэу и 8-м нэс Адыгэ Респуб­ликэм блог-турэу «Культурэм ишъолъыр — Адыгеир» щыкIощт. Урысыем ишъолъыр зэфэшъхьафмэ къарыкIыгъэ блогер зекIо 12 къеблэгъагъ. ЗекIо лъэныкъомкIэ проектыр зыфэ­IорышIэщтыр Адыгеим идэхагъэ зэлъягъэшIэгъэныр ары. Мэфи­тфым къыкIоцI зекIо купым программэ гъэнэфагъэ ыгъэцэкIэщт. Проектым къыдилъы­тэрэ IофтхьэбзэшIухэм якIэщакIу Адыгэ Республикэм изаслуженнэ артистэу Ацумыжъ Адам. Президент платформэу «Урысыер — амалышIухэм яхэгъэгу» зыфиIорэм ипроектэу «Топ

Блогым» текIоныгъэр ащ къыщыдихыгъ. Мары Адам къытфиIотагъэр:

— Мэфитфым къыкIоцI зекIо купыр нэIуасэ афэтшIыщт Адыгеим ичIыпIэ дахэхэм, культурэм епхыгъэ Iофтхьабзэхэм ахэр ахэлэжьэщтых, адыгэ шхыныгъохэм, хьакIэ пэгъокIыкIэм, адыгэ къуаем ишIыкIэ ащыдгъэгъозэщтых, къушъхьэхэм ятеплъэ дахэ ядгъэлъэгъущт.

[caption id="attachment_135435" align="aligncenter" width="800"] А. Лаутеншлегер.[/caption]

Проектэу «Культурэм ишъо­лъыр — Адыгеир» джыри ­илъэс хъугъэп зызэхэдгъэуцуагъэр. НыбжьыкIэ проектхэмкIэ Урысыем зэнэкъокъоу щыкIуагъэм Федеральнэ агентствэу ныбжьыкIэ Iофхэм афэгъэза­гъэм проектым къыщыдыри­гъэштагъ. 2022-рэ илъэсым шышъхьэIум фестивалэу «Таврида Арт» зыфиIорэм а зэнэ­къокъур щыкIуагъ. Гухэлъэу сиIагъэр зы проектышхоу, социальнэ хъытыум къыубытэу, ар гъэпсыгъэныр ары.

Социальнэ хъытыумкIэ зэ­нэкъокъоу редгъэкIокIыгъэм нэбгыри 180-рэ хэлэжьагъ, ахэм 12 къахэтхыгъ ыкIи Адыгеим къедгъэблэгъагъэх. Гухэлъ шъхьа­Iэу тиIагъэр Адыгэ Рес­публикэм идэхагъэ, лъэпкъым ишэн-хабзэхэм нэIуасэ афэтшIынхэр, тикъушъхьэ лъагэхэр, тишхын гохьхэр, республикэм ыцIэ чыжьэу зыгъэIугъэ адыгэ къуаем ишIыкIэ ядгъэлъэгъу- ныр ары.

ХьакIэхэр Адыгэ Республикэм и Лъэпкъ музей рагъэблэгъагъэх ыкIи ащ блог-турыр щырагъэжьагъ. Ащ хэлажьэхэрэр му­зеим ичIыпIэ анахь гъэшIэгъонхэм нэIуасэ афашIыгъэх. Джащ фэдэу музеим ихьакIэщ Адыгэ театрэм илитературнэ-­музыкальнэ къэгъэлъэгъон фэ­багъэ хэлъэу щырекIокIыгъ.

Пчыхьэзэхахьэр къызэIуихыгъ АР-м культурэмкIэ иминистрэ игуадзэу Кушъу Светланэ. «Хэбзэ дахэу тэ тиIэр джащ фэд» зыфиIорэ гущыIэ­хэмкIэ къыригъажьи, хьакIэхэм лъэшэу Адыгеир зэрафэчэфыр къариIуагъ.

Адыгэ театрэм ихудожест­веннэ пащэу Ацумыжъ Рустам зэхахьэм хэлэжьагъэхэм ащыщ, театрэм иартистхэр Расул Гамзатовым, МэщбэшIэ Исхьакъ, КъумпIыл Къадырбэч ыкIи нэмыкIхэм яусэ дэхабэхэм къя­джагъэх, «Си Къэсэй» зыфиIорэ ижъырэ гъыбзэр къаIуагъ.

[caption id="attachment_135462" align="aligncenter" width="800"] А. Лаутеншлегер.[/caption]

ХьакIэми ягуапэу гущыIэ дэ­хабэ бысымхэм къапагъохыгъ, Донецкэ къикIыгъэ блогерыр усэ гъэшIэгъон къеджагъ.

Блогерэу Надежда Ермаковар, къалэу Москва къикIыгъ, каналэу ТНТ-м ипащ, щыIэныгъэм чIыпIэ зэжъу ригъэуцогъэ бзылъфыгъэмэ афэгъэхьыгъэ къэтынхэм Iоф адешIэ.

— Апэрэу Адыгэ Респуб­ли­кэм сыкъэкIуагъ, блог-турыми апэрэу сыхэлажьэ. СытеукIытыхьэ адыгэмэ якультурэ фэгъэхьыгъэу сшIэрэр зэрэмакIэм. Адыгэ къуаемрэ адыгэмэ япщ-оркъхэмрэ якъэбархэм нахь сащыгъуаз. Лъэшэу сыкъакIо сшIоигъуагъ адыгэмэ якультурэу чыжьэу Iугъэр зэзгъэшIэнэу. Тихэгъэгу чIыпIэ гъэшIэгъоныбэ зэриIэр язгъэлъэгъуныр ары пшъэрылъ шъхьаIэу зыфэзгъэуцужьыгъэр. Сигухэлъ къыздэ­хъугъ ыкIи непэ мы Iофтхьэбзэ дахэм сыхэлэжьэнэу синасып къыхьыгъ. Сянэ илъэIуи фэз­гъэцэкIэщт — адыгэ къуае фыз­дэсхьыщт.

Владислав Хвостиковыр, со­­циальнэ хъытыоу «ВКонтакте» зыфиIорэм творческэ гъусэныгъэ дызиIэхэм ащыщ, Ивановскэ хэкум къикIыгъ. Ащ къыхигъэщыгъ:

— «Блогер-миллионник» зыфаIохэрэм сащыщ. Адыгеим апэрэу сыкъэкIуагъ, зекIоныр лъэшэу сикIас, анахьэу етIани къушъхьэлъэ чIыпIэхэр ары сыгу рихьыхэрэр. Адыгеим ичIыопс дэхэ дэд. Шъо шъуадэжь щыфаб, тэ талъэныкъо джыри щы­чъыIэтагъ. Сехъырэхъышэрэп мы блог-турым гухахъо зэрэхэзгъотэщтым, зыкIи сымылъэ­гъугъэ чIыпIэ дахэхэм нэIуасэ сызэрафэхъущтым, шъуиадыгэ къуае идэгъугъэ сыуплъэкIун амал зэрэсиIэщтым. Лъэшэу саIукIэмэ сшIоигъу цIыф гъэшIэгъонхэу адыгэ шъолъырым исхэм, джащ фэдэу бизнесым пылъхэми яIофшIакIэ зыщыз­гъэгъозэнэу сыфай.

Удмуртием ныбжьыкIэ Iоф­хэмкIэ и Агентствэ ипащэ игуа­дзэу Максим Файзуллиным къыхигъэщыгъ:

— УрысыемкIэ зекIоныр къызщебгъэжьэн фаер Адыгеир ары, сыда пIомэ шъолъырмэ апэ шъуит. Адыгэхэм якультурнэ кIэн нэIуасэ сыфэхъунымкIэ мы блог-турым ишIуагъэ къызэрэкIощтым сехъырэхъышэрэп. ЗекIоу ущытыным пае чIыпIэу уздакIорэм щыпсэурэ лъэпкъым итарихъ ущыгъозэн фаеу сэ­лъытэ. Сыгу Iэтыгъэу сызэрэ­кIожьыщтым сицыхьэ телъ.

Удмуртием къикIыгъэ Мария Сазыкинам къыхигъэ­хъуагъ:

— Ацумыжъ Адам къырихьы­жьэгъэ Iофыр лъэшэу дэгъу. Адыгеим идэхагъэ зэрэхэгъэгоу зэлъашIэн, хьакIэхэр нахьыбэу къышъуфэкIонхэ амал яIэныр — а пшъэрылъ шъхьаIэр Адам къыдэхъунэу сэгугъэ. IэкIыб хэгъэгум укIон ищыкIагъэп, Урысыем чIыпIэ дэхэ дэдэхэр иIэх. Адыгеим изакъоми, узэплъын, бгъэшIэгъон екъу.

Блог-турым иапэрэ мафэ лъэшэу хьакIэхэм ашIогъэшIэгъонэу, рэзэныгъэ ин хагъуатэу кIуагъэ.

Неущ блогерхэр къушъхьэм ащэщтых. Лэгъо-Накъэ, Азишскэ гъочIэгъым, къушъхьэ цакIэу Утюгым изыплъыхьапIэ, нэмыкI чIыпIэ дахэу тиIэхэр арагъэлъэгъущтых.

Нэужым шыхэм атесхэу зекIо кIощтых, Гъозэрыплъэ нэужым екIолIэщтых, Шъхьэгуащэ рафтхэмкIэ къехыщтых. Мафэр псэупIэу Дахъо щызэфашIы­жьыщт.

Бэдзэогъум и 8-м модельер-дизайнерэу Сусанна Макеровам лъэпкъ модэмкIэ иIэшIагъэхэр блогерхэм арагъэ­лъэгъущтых, Мыекъуапэ къыщыращэкIыщтых, блог-турыр Къо­кIыпIэм имузей щызэхащэщт «Черкес балымкIэ» зэфашIы­жьыщт.

Лъэпшъыкъо Фатим.