Мыпрофессиональнэ футболым Адыгеим зы­зэрэщырагъэушъомбгъущтым Мыекъуапэ щы­те­гущыIагъэх.

Шъолъыр физкультурэ-спорт общественнэ организациеу ­«Адыгэ Республикэм футболымкIэ ифедерацие» физическэ культурэмрэ спортымрэкIэ рес­публикэ комитетым иконференц­зал щызэхищэгъэгъэ зэIукIэм муниципалитетхэм ялIыкIохэри хэлэжьагъэх. ФутболымкIэ фе­дерацием ипэщакIэу Хьакъунэ Нурбыйрэ республикэм испорт комитет итхьаматэу Дэгужъые Муратрэ зыхэлэжьэгъэхэ Iоф­тхьабзэм Iофыгъо шъхьаIэу къыщаIэтыгъэр Адыгэ Республикэм ичемпионатэу, и Кубокэу рес­публикэм и ЛIышъхьэ ишIухьафтынхэр къазыщафагъэшъошэщтхэм язэхэщэн ары. НыбжьыкIэ купхэм апайи зэнэкъокъухэр щы­Iэщтых.

Муниципалитетхэм футболымкIэ якупхэр зэнэкъокъум хэлэ­жьэнхэмкIэ мылъку къэкIуапIэ­хэм, футболешIапIэхэм атефэщт ахъщэм, футболистхэм транспортыр къазэрафагъотыщтым, зэнэ­къокъухэр зэрэзэхащэщтхэм, къэ­барлъыгъэIэс амалхэмрэ Ин­тернетымрэ ахэм яхьылIэгъэ къэбархэр къазэрара­гъэхьащтхэм япхыгъэ Iофыгъо­хэми атегущы­Iагъэх. Хабзэ зэ­рэхъугъэу, финал ешIэгъухэр зызэхащэщтхэр АР-м и Мафэ ехъулIэу ары.