Адыгеим и ЛIышъхьэу КъумпIыл Мурат Мыекъопэ районымкIэ поселкэу Камен­номостскэм дэт лагерэу «Лань» зыфиIорэм щыIагъ. [caption id="attachment_135174" align="aligncenter" width="800"] А. Гусев.[/caption]

Республикэм ипащэ игъусагъэх федеральнэ инспектор шъхьаIэу Сергей Дрокиныр, АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч, Мыекъопэ районым ипащэу Михаил Марьиныр.

Лагерым ипащэхэм къызэраIуагъэм­кIэ, джыдэдэм кIэлэцIыкIу 375-мэ мыщ зыщагъэпсэфы, 185-р Херсон хэкумкIэ Геническэ районым къикIыгъэх. Гъэма­фэм а хэкум щыщ кIэлэцIыкIу 530-мэ лагерым зыщарагъэгъэ­псэфын ямурад.

Республикэм и ЛIышъхьэ зыгъэпсэфыгъо уахътэр зэрэзэхащэрэм нэIуа­сэ зыфишIыгъ, кIэлэцIыкIухэми, лагерым иIофышIэхэми адэгущыIагъ. Мы мафэмкультурэ Iофтхьабзэу «Мно­го­­гранная Адыгея» зыфиIорэр зэхащэ­гъагъ.

[caption id="attachment_135175" align="aligncenter" width="800"] А. Гусев.[/caption]

КIэлэцIыкIухэр адыгэхэм яорэдхэмрэ якъашъохэмрэ нэIуасэ афашIыгъэх, рес­публикэм итарихърэ икультурэ кIэнрэ афэгъэхьыгъэу къафаIотагъ. Нарт эпосым фэгъэхьыгъэ мультфильмхэр къафагъэлъэгъуагъэх.

КъокIыпIэм щыпсэурэ лъэпкъхэм ямузей и Темыр-Кавказ къутамэ иIофы­шIэхэм зэхащэгъэгъэ творческэ мастерскойхэм дышъэидэнымкIэ кIэлэцIыкIухэм апае мастер-класс къащатыгъ, лъэпкъ мэкъэмэ Iэмэ-псымэхэмрэ шы IапIэхэмрэ зэрашIыхэрэми нэIуасэ фашIыгъэх. Адыгеим испорт комитет IэпыIэгъу къафэхъу­зэ, вожатэхэм адыгэ лъэпкъ джэгукIэхэр зэхащагъэх. Адыгэ къашъомкIэ кIэлэцIыкIу ансамблэу «Мыекъуапэ инэфылъэхэр» зыфиIорэм игъусэхэу кIэлэцIыкIухэм лъэпкъ къашъохэр къашIыгъэх.КъумпIыл Мурат кIэлэцIыкIухэм адэгущыIэзэ дэгъоу загъэпсэфынэу, акIуачIэ хэхъуагъэу еджэным фагъэзэжьынэу афэлъэIуагъ.

[caption id="attachment_135176" align="aligncenter" width="800"] А. Гусев.[/caption]

«Республикэми, хэгъэгум инэмыкI шъолъырхэми арыс кIэлэцIыкIухэм тилагерьхэм пчъагъэрэ защагъэпсэфыгъ. Мары Херсон хэкум къикIыгъэ кIэлэцIыкIухэми Адыгеим илъэгъупхъэ чIыпIэхэм тIэкIу-тIэкIузэ нэIуасэ зафашIы. КIэлэцIыкIухэм дэгъоу республикэм зыщагъэ­псэфынымкIэ, япсауныгъэ щагъэпытэнымкIэ, культурэ Iофтхьабзэхэм ахэр чанэу къахэгъэлэжьэгъэнхэмкIэ тфэлъэ­кIырэр зэкIэ тэшIэ. ТапэкIэ джыри шIуа­гъэ зыпылъ гъэшIэгъоныбэ къышъожэ», — къыIуагъ КъумпIыл Мурат.

Шъугу къэтэгъэкIыжьы гъэмэфэ зыгъэ­псэфыгъор кIэлэцIыкIухэр мафэрэ зыдэщыIэрэ организацие 94-м мыгъэ зэращызэхащэщтыр. Ахэм ащыщэу лагерьхэу «Горнэмрэ» «Ланьрэ» кIэлэцIыкIу мин 1,6-м ехъумэ мыгъэ защагъэпсэфыщт. Республикэм щыщ кIэлэцIыкIу мин фэдизмэ хы ШIуцIэ Iушъом (псэупIэхэу Сукко, Кабардинкэ) защагъэпсэфын алъэ­кIыщт. КIэлэцIыкIу мини 7,5-м ехъу­мэ гъэмафэм загъэпсэфынэу ыкIи япсауныгъэ агъэпытэнэу амал яIэщт. Ащ пае сомэ миллиони 121-м ехъу къыхагъэ­кIыщт. Илъэсыр къызихьагъэм щегъэжьагъэу республикэм ис кIэлэцIыкIуи 100 Урысые кIэлэцIыкIу гупчэхэу «Артек», «Орленок», «Смена» зыфиIохэрэм ащы­Iагъ.

АР-м и ЛIышъхьэ ипресс-къулыкъу