Луганскэ академическэ филармонием иартистхэмрэ камернэ-музыкальнэ ансамблэу «Киевская Русь» зыфиIорэмрэ Адыгеим и Къэралыгъо филармоние концерт къыщатыгъ.

[caption id="attachment_135155" align="aligncenter" width="800"] Александра Балабась.[/caption]

Мэкъуогъум и 22-м къыщыублагъэу ахэм Урысыем ичIыпIэ зэфэшъхьафхэр къакIухьэхэзэ къэгъэлъэгъонхэр къатыгъэх. Новочеркасск, Новошахтинск, ЦIэмэз ыкIи ТIуапсэ, нэужым Мыекъуапэ яблэгъагъэх. Концертым ыпэкIэ республикэм икъэбарлъыгъэIэс амалхэм артистхэм зэдэгущыIэгъу адашIыгъ.

Купэу «Киевская Русь» зыфиIорэм ихудожественнэ пащэу, ЛНР-м инароднэ артистэу Виктор Фалалеевым къызэриIотагъэмкIэ, къалэ пэпчъ фабэу къа­­щыпэгъокIыгъэх, Iэгутео мэкъэшхокIэ агъэкIотэжьыщтыгъэх.

— Мыщ фэдэу зэпымыоу Iоф пшIэ зыхъукIэ, къины. Урысыем икъыблэ ит къалэхэр тхьамафэрэ къэткIухьагъэх, такъыщыуцузэ концертхэр къэттыщтыгъэх, ау ащ къэс кIуачIэ къытатыщтыгъ къытэплъынхэу къекIуалIэхэрэм, ахэм ягузэхашIэхэм, — къытфиIотагъ Виктор. — ТыкъыздикIыгъэми Iоф щытэшIэ зэпымыоу, къэгъэлъэгъонхэр тэгъэ­хьазырых. ХэушъхьафыкIыгъэ дзэ операцием титворческэ щыIэныгъэ зэпигъэугъэп. Донбасс щыпсэухэрэми, дзэ къулыкъушIэхэу тичIыгу къэзыухъумэхэрэми къэгъэлъэгъонхэр къафэтэтых. Тызажэрэр — къытэплъы­хэрэм щхыпэу къякIурэмрэ яIэгутео макъэрэ.

Виктор къытиIуагъэм иIофшIэгъухэм дырагъэштагъ. Донбасс щыпсэухэрэр къиныгъоу зэрихьылIагъэхэм ямылъытыгъэу, ящыIэныгъэ пытэу творчествэр къыхэнагъ.

ГущыIэм пае, дунэе зэнэкъо­къухэм ялауреатэу Анатолий Лаврентьевыр хэушъхьафыкIыгъэ дзэ операцием хэлэжьагъ, дзэм щытхъу къызэрэщилэжьыгъэм пае тынхэри къыфагъэшъоша­гъэх, нэужым искусствэм зыфигъэзэжьыгъ. КъызэриIуагъэмкIэ, творчествэм укIэрычыгъэу ущы­Iэшъущтэп — анахь зыщышIункI лъэхъанми нэфынэр ащ къеты.

Луганскэ народнэ республи­кэм изаслуженнэ артисткэу На­талья Олефиренкэм къыхигъэ­щыгъ — уичIыгу сыд фэдэ бзэкIи шIу плъэгъун плъэкIыщт, укъызщыхъугъэм гуфэбагъэу фыуиIэр зыми птырихышъущтэп.

[caption id="attachment_135156" align="aligncenter" width="800"] Александра Балабась.[/caption]

— ЗэкIэхэмкIи тызы цIыф­лъэпкъ. Къалэхэр къэткIухьэхэзэ къыдгурэIо ахэм ащыпсэу­хэрэм зэкъотыныгъэ къызэрэддыряIэр, а зы орэдхэр къэтэIох. Лъэшэу тэгушIо мы Iофтхьабзэм тызэрэхэлэжьэшъугъэмкIэ, — ыIуагъ Наталье.

Дунэе зэнэкъокъухэм ялауреатэу Софья Тихаям къыкIигъэтхъыгъ:

— Артист пэпчъкIэ мэхьанэшхо иI цIыфхэм анигъэсынэу зыфэе гузэхашIэр апкъырыхьаным. Ащ ыгу къикIырэр къеплъы­хэрэм зызыхащэкIэ, зымыуасэ щыIэп. УрысыбзэкIэ, украиныбзэкIэ, инджылызыбзэкIэ, нэмы­цы­бзэкIэ, итальяныбзэкIэ ыкIи чехыбзэкIэ орэдхэр къэсэIох, ау къысэплъыхэрэм ыкIи къысэдэ­Iухэрэм ахэр апкъырэхьэх сэ сыгу къызэрикIыхэрэм елъытыгъэу.

Артистхэм тадэгущыIэфэ къэ­гъэлъэгъоным еплъынэу цIыфхэр къекIуалIэщтыгъэх. Ахэм ахэ­тыгъ АР-м культурэмкIэ иминистрэ иапэрэ гуадзэу Ольга Гавшинар. Луганскэ академическэ филармонием искусствэхэмкIэ иIофышIэхэр тиреспубликэ къызэрэкIуагъэхэр зэригуапэр ащ къыхигъэщыгъ, шIуфэс гущыIэхэр апигъохыгъэх.

Зы жьыкъэщэгъу фэдэу концертыр кIуагъэ. Джырэ ыкIи советскэ авторхэм аусыгъэ орэдхэр, мэкъамэхэр ащ щыIугъэх, къэшъокIо ансамблэу «Рон­до» зыфиIорэм икъашъохэм пстэури къагъэдэхагъ.

Бэрэ зэпымыугъэ Iэгутео макъэкIэ артистхэр яплъыгъэхэм агъэкIотэжьыгъэх.

Концертыр федеральнэ программэу «Тэ — ты Урысый» зыфиIорэм къыдыхэлъытагъэу,   УФ-м культурэмкIэ и Министерствэ и Урысые гастроль-концерт план тетэу зэхащагъ.

Александра Балабась.