КIэлэцIыкIухэм апаекIэ журналэу «Жъогъобыныр» къы­зыдэкIырэр илъэс 35-рэ хъугъэ.

Джащ фэдэу журналхэу «Родничок Адыгеи», «Зэкъошныгъ» ыкIи «Литературная Адыгея» зыфиIохэрэр къыдэкIых. Мыщ фэдэ гухэлъ иныр пхырыщыгъэным кIэщакIо фэхъугъэр ыкIи журналиплIым яредактор шъхьаIэр тхэкIо цIэрыIоу МэщбэшIэ Исхьакъ ары.

Непэ сэ анахьэу зигугъу къэсшIыщтыр зимэфэкI хэзгъэунэфыкIырэ журналэу «Жъогъобыныр» ары. АдыгабзэкIэ ар илъэсым плIэ къыдэкIы ыкIи тефэу цIэ дэхэ дэди иI. КIэлэцIыкIухэм, сабыйхэм анахь псэкъэгъэшIыгъэ дахэ зэрэщымыIэр хэти тэшIэ, ахэм мы журналыр атегъэпсыхьагъ. ЯадыгабзэкIэ еджэнхэ-тхэнхэ алъэкIэу, ащкIэ ягупшысэ къыраIотыкIынэу гъэсэгъэнхэр, щыIэныгъэ лъэныкъуабэмкIэ япIуныгъэ, ядунэегурыIуакIэ гъэлъэшыгъэныр ыкIи ежь кIэлэцIыкIухэр ашъхьэкIэ мы журналым икъыдэгъэкIын хэгъэлэжьэгъэнхэр ары пшъэрылъ шъхьаIэу зэшIуихырэр.

Журналыр нэр зыфищэу сыдигъуи пкIырапкIын, тхыгъэу къыдахьэрэ пэпчъ сурэтхэр игъус. КъызэрэсIуагъэу, илъэсым плIэ къыдэкIы, арэу зыхъукIэ, ар охътэ лъэхъани 4-у — кIымафэм, гъатхэм, гъэмафэм ыкIи бжыхьэм афэгъэ­хьыгъэу зэхэт.

Илъэсым иуахътэ пэпчъкIэ тхыгъэ ­этюдхэр, адыгэ усакIохэм яусэхэм, рассказ цIыкIухэм ащыщхэр, пIуныгъэ мэхьанэ зиIэ гущыIэжъхэр, цIыкIухэм ахэр арагъэшIэнхэм пае, адыгэ пшысэ кIэкI IупкIэхэр, кIэлэцIыкIу рассказхэр къыдэхьэх.

Джащ фэдэу анахь мэхьанэ зиIэр Iэдэб, нэхъой, гулъытэ, щэIагъэ, гукIэгъу ыкIи гумэкI яIэу сабыйхэр пIугъэнхэр ары. Ащ елъытыгъэу, «Адыгагъэр — цIыфыгъ» зыфиIорэ темэр игъорыгъоу журналым къыдэхьэ. Адыгагъэр къыбгурызгъэIорэ, нахь къыппэблагъэ зы­шIырэ сатыриплIхэу тхакIоу МэщбэшIэ Исхьакъ мыпшъыжьэу ыусыгъэхэм ащыщ­хэри, акъылым, пIуныгъэм хагъа­хъоу, мыщ къыдэхьэх. МэфэкI къыдэ­кIыгъом ахэр къыщытыгъэх: * * * УиIофшIагъэ шIушIэ хэлъмэ, КъэбгъэшIагъэр насыпыгъ. Ау джы нэсы ар гухэлъмэ, ПшIэгъэ пстэури пIэпызыгъ. * * * ПаIор напэшъ, зыщымых, Адыгагъэм удэмых. ПаIор пшъхьэмэ, шъхьэм егъапш, Джаущтэу пшIэмэ, улIы пхъаш. * * * ШъхьэфэгъэшIо тэдж зышIырэм ЫпхъэкI пызрэп, Адыгабзэм рымыпшъырэм Ылъапсэ сысрэп.

КIэлэцIыкIухэр мызэщынхэм ыкIи пIугъэнхэм тегъэпсыхьагъ «Зымыгъэзэщ! Ор-орэу гъэлэжь» зыфиIорэ рубрикэр.

Мы нэкIубгъом сабыйхэм якIэсэ псэу­шъхьэхэр, къэкIырэ лъэпкъхэр, къытэшIэкIыгъэ дунаим идэхагъэ арыолъагъо. Ахэр шъо зэфэшъхьафхэмкIэ агъэлэжьызэ, ахэр зэхэт пшысэхэу, хырыхыхьэхэу ашIэхэрэр агу къагъэкIыжьых, игъорыгъоу щыIэныгъэм щыщ мэхъух.

Журнал нэкIубгъо пэпчъ зы гъэшIэгъон горэм фэгъэхьыгъ: тичIыопс ыкIи тимэзхэм ахэс псэушъхьэхэр зыфэдэхэр; ежь еджэкIо цIыкIухэм чаныгъэ-­Iушыгъэу къахафэрэр ыкIи дэгъоу зэ­реджэхэрэм готэу, спортым, къашъом, орэдым, сурэтшIыным ыкIи нэмыкI IэпэIэсагъэхэмкIэ зыкъызэрэзэIуахыхэ- рэр къыщаIотагъ.

Пшысэхэр, рассказ кIэкIхэр, хырыхыхьэхэр, адыгэ кIэлэцIыкIу джэгукIэхэр журналым дэбгъотэщтых. Ежь еджэкIо IорышIэ хъупхъэхэм яIэшIагъэ­хэри, ясурэтхэри къыдэхьэх. «Жъогъо­быныр» унагъомкIи, сабыйхэмкIи, кIэлэцIыкIу IыгъыпIэхэмкIи, ублэпIэ еджапIэхэмкIи мэхьанэ зиIэу, пIуныгъэр ыкIи еджэн-гъэсэныгъэр хэти нахь пэблагъэ зышIырэу сэ сеплъы. Журналым илъэсыбэ хъугъэу Iоф дэзышIэрэ редакторыр Дзыбэ Назрэт.

«Жъогъобыныр» къызыдэкIырэр мыгъэ илъэс 35-рэ хъугъэ. Ар мысабыижь дэдэми, джыри ныбжьыкI, тапэкIи адыга­бзэр ыгъэжъынчэу, кIэлэцIыкIухэр, ны-тыхэр, зэкIэ журналыр зикIасэхэр ыгъэ­гушIоу бэрэ «Жъогъобыныр» щы­Iэнэу, къыдэкIынэу тыфэлъаIо. ЗэкIэ журналым еджэхэрэм ыкIи дэлажьэхэрэм мэфэ­кIымкIэ тафэгушIо.