Урысые олимпийскэ мафэм ихэгъэунэфыкIын къыдыхэлъытагъэу футбол цIыкIумкIэ зэнэкъокъу Мыекъуапэ щызэхащагъ. Iофтхьабзэу агъэнэфэгъагъэхэмкIэ ар аужырэу щытыгъ.

Мафэрэ Iоф зышIэрэ лагерьхэм якоманди 9 республикэм икъэлэ шъхьаIэ игурыт еджапIэу N 11-м къыщызэрэугъоигъэх. Зэфэхьысыжьхэм къызэрагъэлъэгъуагъэмкIэ, текIоныгъэр къыдихыгъ гурыт еджапIэу N 7-м, ащ ешIэгъуи 4 иIагъ, зэкIэри къыхьыгъэх. ЯтIонэрэ хъугъэ лицееу N 35-м икомандэ, ящэнэрэ чIыпIэр къыдихыгъ гурыт еджапIэу N 15-м.

ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм медальхэр ыкIи дипломхэр афагъэшъошагъэх.

Урысые олимпийскэ мафэм къыдыхэлъытагъэу Iофтхьэбзи 6 Мыекъуапэ щырагъэкIокIыгъ. Ахэм ащыщых флешмобыр, райдерхэм яфестиваль, теннис цIыкIумкIэ, футболымкIэ ыкIи баскетболымкIэ зэнэ­къокъухэр, джащ фэдэу «ЩыIэныгъэм екIурэ лъэбэкъу минипшI» зыфиIорэр. Ахэм Адыгеим икъэлэ шъхьаIэ щыпсэурэ нэбгырэ 500-м ехъу ахэлэжьагъ.