Къолъхьэ тын-Iыхыным пэшIуекIогъэныр
Адыгеим и ЛIышъхьэу КъумпIыл Мурат АР-м щызэхэщэгъэ Комиссиеу къолъхьэ тын-Iыхыным пэуцужьыгъэным фытегъэпсыхьагъэм изэхэсыгъо тыгъуасэ зэрищагъ.
Республикэм икъэралыгъо хабзэ икъулыкъухэм яшэпхъэ- правовой актхэм къолъхьэ тын-Iыхыным епхыгъэ IофыгъохэмкIэ яуплъэкIунхэр зэрэкIохэрэм, джащ фэдэу чIыпIэ зыгъэIорышIэжьыным икъулыкъухэр ащ пэуцужьынхэм япхыгъэ Iофыгъохэм щахэплъагъэх.
Адыгэ Республикэм 2022-рэ илъэсым ыкIи 2023-рэ илъэсым иа 1-рэ мэзищ къэралыгъо хабзэм икъулыкъухэм яшэпхъэ- правовой актхэм яуплъэкIун фэхъугъэ кIэуххэм къатегущыIагъ Урысыем юстициемкIэ и Министерствэ Адыгэ РеспубликэмкIэ и ГъэIорышIапIэ ипащэ ипшъэрылъхэр зыгъэцэкIэрэ Дмитрий Головко.
ГущыIэм пае, 2022-рэ илъэсым документ мин 1,1-м ехъу ауплъэкIугъ, 5-мэ къолъхьэ тын-Iыхын нэшанэ зиIэхэр къахагъэщыгъэх. Мы илъэсым иапэрэ мэзищ шэпхъэ-правовой акт 268-рэ ауплъэкIугъ, ахэм ащыщэу ащ фэдэ нэшанэ зиIэу агъэунэфыгъэр зы. НепэкIэ республикэм ишэпхъэ-правовой актхэм зэдимыштэныгъэу ахэтхэр дагъэзыжьыгъэх.
Адыгэ Республикэм и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Хъоткъо Саниет а Iофым фэгъэхьыгъэ псалъэ къышIыгъ. Ащ къызэрэхигъэщыгъэмкIэ, АР-м и ЛIышъхьэ и Правовой гъэIорышIапIэ къолъхьэ тын-Iыхыным ылъэныкъокIэ непэ щыIэ шэпхъэ-правовой актхэр еуплъэкIух, джащ фэдэу ащ фэдэ актхэм япроектхэми ахэплъэ.
ЮстициемкIэ Министерствэмрэ прокуратурэмрэ игъусэхэу республикэ хэбзэгъэуцугъэхэр федеральнэхэм зэрадиштэхэрэм, цIыфхэм яфедэхэм якъэухъумэн тегъэпсыхьэгъэ актхэм язытет анахьэу анаIэ атырадзэ.
Ащ къыIуагъэхэм къатегущыIэзэ Адыгеим и ЛIышъхьэ къызэрэхигъэщыгъэмкIэ, республикэм ишэпхъэ базэ анахьэу къыдилъытэн фаер уахътэм къыгъэуцурэ пшъэрылъхэр ары, джащ фэдэу федеральнэ хэбзэгъэуцугъэми ар диштэн фае.
«Министерствэхэмрэ къулыкъухэмрэ апае егъэджэн Iофтхьабзэхэр зэхашъущэх республикэм ишэпхъэ актхэм ащ фэдэ хэукъоныгъэхэр ахэмыхъухьанхэм пае. Мыщ дэжьым цIыфхэм къэралыгъо фэIо-фашIэхэр зэралъагъэIэсыхэрэр Iэрыфэгъоу щытынхэм, ипIалъэм документхэр аIэкIагъэхьанхэм ыкIи нэмыкIхэм шъунаIэ атежъугъэт. ТшIэрэр зэкIэ цIыфым ифедэхэм атегъэпсыхьагъэу щытын фае», — къыIуагъ КъумпIыл Мурат.
ЧIыпIэ зыгъэIорышIэжьыным икъулыкъухэм къолъхьэ тын-Iыхыным пэшIуекIогъэнымкIэ яIофхэм язытет къытегущыIагъэх Джэджэ районым ипащэу Андрей Таранухинымрэ Кощхьэблэ районым ипащэу Хьамырзэ Зауррэ.
Колъхьэ тын-Iыхыным пэшIуекIогъэным ылъэныкъокIэ Iоф зышIэхэрэм яIэпэIэсэныгъэ зыкъегъэIэтыгъэным пае муниципалитетхэм Iофтхьэбзэ гъэнэфагъэхэр ащызэрахьэх, комиссиехэр ащызэхащэх, цIыфхэм яеплъыкIэхэр зэрагъашIэх ыкIи нэмыкIхэр зэшIуахых.
ЗэIукIэм икIэуххэр зэфихьысыжьхэзэ республикэм и ЛIышъхьэ къызэрэхигъэщыгъэмкIэ, къолъхьэ тын-Iыхыным пэшIуекIорэ Iофтхьабзэр нахь тэрэзэу зэхэщэгъэн, кадрэхэм ягъэхьазырын анаIэ нахь тырагъэтын фае.
АР-м и ЛIышъхьэ ипресс-къулыкъу